BE-ja shpreh shqetësim për politizimin e festivalit “Mirëdita, dober dan” – kërkon nga Serbia plotësimin e standardeve

Bashkimi Evropian ka shprehur shqetësim për anulimin e festivalit “Mirëdita, dober dan” në Beograd, sipas tyre Serbia është dashur të garantojë një mjedis të sigurt për mbajtjen e tij.

Zëdhënësi i BE-së, Peter Stano, vlerësoi se ky festival është një iniciativë e mirë e cila do të kontribuonte në ndërtimin e urave mes Kosovës dhe Serbisë.

“Jemi të shqetësuar për politizimin e një nisme kulturore të organizuar nga organizata të shoqërisë civile që dëshirojnë të promovojnë shkëmbimet ndërkulturore dhe të qytetarëve”, deklaroi Stano për Radio Televizionin e Kosovës.

Duke shtuar se “është detyrë e autoriteteve shtetërore kompetente të sigurojnë që organizatorët të jenë në gjendje të veprojnë në një mjedis të sigurt”.

BE-ja ka kërkuar nga Serbia që të mbajnë standardet e kërkuara.

“Si vend kandidat, ne presim që Serbia t’i mbajë këto standarde”, tha Stano.

Kryeministri i Serbisë, Millosh Vuçeviç, ka deklaruar se s’ka parë arsye që në Serbi të ketë festival sikurse “Mirëdita, dobar dan”.

Më 28 qershor, ministria e Punëve të Jashtme të Kosovës ka reaguar pasi që Ministri i Punëve të Brendshme të Serbisë, Ivica Daçiç, të enjten, ka urdhëruar ndalimin e Festivalit “Mirëdita, dobar dan”, duke thënë se ky vendim vërteton edhe një herë se qeveria serbe është kundër çdo lloji dialogu në mes Kosovës dhe Serbisë.

Përmes një komunikate për media, nga MPJ-ja thanë thënë se ndalimi i festivalit me me urdhër të ish-zëdhënësit të regjimit gjenocidal të Sllobodan Millosheviç-it, “është edhe një dëshmi e vazhdimit të politikës, mendësisë dhe veprimeve të regjimit të kaluar”.

“Këtë fushatë të egër publikisht e nisi njeriu i listave të zeza dhe ish shefi i BIA, [Aleksandër] Vulin, të cilit pastaj iu bashkua ai që duhej të ishte në krye të organizimit të festivalit dhe mirëvajtjes së tij, Ministri i Kulturës, Nikola Selakoviç”, theksohet në reagim.

Reagim për këtë temë ka pasur edhe nga Kryeministri i Kosovës, Albin Kurti.

Serbia, në vlerësimin e Kurtit, me ndalimin e Festivalit ka shfaqur edhe njëherë “armiqësinë e saj të paepur ndaj gjithçkaje që ka të bëjë me paqen dhe pajtimin”.

“Një festival kulturor me një histori dhjetëvjeçare të festimit të diversitetit dhe bashkimit të artistëve nga Kosova dhe Serbia, ‘Mirëdita, Dobar Dan’ u rrëmbye nga Vulin-i dhe MPB Daçiç-i, të cilët e deformuan atë, përtej njohjes, në një paradë groteske të urrejtjes dhe mesazhe diskriminuese. Në vend të artistëve, fjala iu dha grupeve të huliganëve”, ka shkruar Kurti në platformën sociale, X.

Kurti ndër të tjera ka potencuar se anulimi i Festivalit ka ardhur pikërisht një ditë pasi presidenti i Serbisë, Aleksandër Vuçiç, në kuadër të dialogut të lehtësuar nga Bashkimi Evropian, ka refuzuar ta nënshkruaj Marrëveshjen e Brukselit/Ohrit.

Ekipi nga Kosova e Festivalit “Mirëdita, dobar dan”, të enjten, është ndaluar nga Policia e Serbisë, 25 kilometra në hyrje të Beogradit, me arsyen se kanë urdhër që “mos të i lejojnë të vazhdojnë tutje”.

Pas rreth një ore zyrtarisht ekipi i përbërë nga gazetarë/kameramanë dhe stafi organizativ i festivalit janë kthyer mbrapshtë për në Kosovë.

Hapja e festivalit ishte paraparë të ndodhte në orën 18:30 të 27 qershorit në sheshin Dorqol.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.