BE-ja, Qeverisë: S’morët parasysh komentet tona për disa projektligje, jemi të shqetësuar

Zyra e Bashkimit Evropian në Kosovës, nëpërmjet një komunikate për media, të mërkurën, ka vlerësuar se Qeveria e Kosovës “nuk i ka marrë parasysh komentet” e Unionit për Projektligjin për Zyrtarët Publik, atë për Komisionin e Pavarur për Media dhe për Këshillin Prokurorial të Kosovës – të cilët pritet të shqyrtohen në Kuvendin e Kosovës.

Sipas Zyrës së BE-së, komentet e bllokut kanë pasur për synim përmirësimin e këtyre projektligjeve dhe kalibrimin e tyre me standardet dhe praktikat më të mira evropiane.

Sa i përket Projektligjit për Zyrtarët Publikë, BE-ja ka shprehur shqetësimin për faktin se Komisioni për Administratë Publike, “nuk ka marrë parasysh këshillat e gjera dhe konsistente që BE-ja ka ofruar gjatë gjithë procesit të hartimit të këtij projektligji”.

“Komisioni i Kuvendit nuk ka trajtuar shqetësimet kryesore lidhur me këtë projektligj, të ngritura në opinione të ndryshme të BE-së, veçanërisht në lidhje me ndryshimet që sjell legjislacioni në postet drejtuese dhe në procedurat e rekrutimit, promovimit dhe performancës në shërbimin civil”, thuhet në komunikatë.

Projektligji si i tillë nëse zbatohet, potencon BE, “minohet profesionalizmi dhe pandashmëria e shërbimit civil”.

“Është gjithashtu shqetësues pasi [projektligji] bie ndesh me vendimin e Gjykatës Kushtetuese të vitit 2023. Kjo rrezikon gjithashtu të cenojë profesionalizimin dhe stabilitetin në shërbimin civil”, thuhet në komunikatë.

Të njëjtat shqetësime, BE-ja, i ka shprehur edhe për Projektligjin për Komisionin e Pavarur të Mediave.

Sipas tyre ky projektligj, nuk pasqyron “shumicën e rekomandimeve të përfshira në Opinionin Ligjor të përgatit nga Këshilli i Evropian”.

“Duke përshirë çështjet delikate siç janë kompetencat dhe financimi i Komisionit të Pavarur për Media, procedurat zgjedhore dhe kushtet e shërbimit për anëtarët e saj, dhe proporcionalitetin e sanksioneve”.

Projektligji aktual për KPM-në, sipas BE-së, kërkon rishikime të mëtejshme për të rritur “qartësinë ligjore, proporcionalitetin dhe përputhshmërinë e mëtejshme me standardet e BE-së dhe Këshillit të Evropës”.

Ndërkaq lidhur me Projektligjin për Këshillin Prokurorial të Kosovës, BE-ja ka shprehur “keqardhje që Kosova nuk kishte kërkuar nga Komisioni i Venecias një opinion pasues”.

“Prandaj BE-ja përsërit rekomandimin e saj të fortë për të rikonsultuar Komisionin e Venecias për këtë projektligj. BE-ja thekson më tej me shqetësim se pavarësisht këshillave dhe mbështetjes sonë të vazhdueshme që i kemi dhënë qeverisë dhe komisioneve përkatëse të Kuvendit, komentet tona nuk janë marrë parasysh, duke përfshirë rritjen e pluralizmit dhe pavarësisë së Komisionit Para-Seleksionues për të siguruar përafrimin me standarde evropiane”.

Zyra e BE-së në Kosovë, ka potencuar, ndër të tjera se këto projektligje “janë kyçe për rrugën e Kosovës drejt BE-së”.

“Vlerësimi i përafrimit me standardet evropiane do të jetë gjithashtu vendimtar për vlerësimin e progresit nga Komisioni i BE-së në raportin e zgjerimit. Prandaj i bëjmë thirrje Kuvendit që t’i rishqyrtojë edhe një herë amendamentet e propozuara për të siguruar që këto projektligje të përmbushin standardet e BE-së”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.