BE-ja në këmbë për ligjin e kontestueshëm për KPM-në, qeveria insiston se i respektoi direktivat e BE-së

Qeveria e Kosovës ka thënë nëpërmjet një komunikate për shtyp të enjten se ka respektuar në plotëni direktivën e Bashkimit Evropian (BE) për Shërbimet e Mediave Audiovizuele (AVMS), duke mbrojtur Ligjin për Komisionin e Pavarur të Mediave (KPM), që është miratuar të enjten nga ligjvënësit kosovarë, pavarësisht kritikave të vetë BE-së dhe organizatave tjera.

Në komunikatën e lëshuar për shtyp nga ekzekutivi kosovar, thuhet se projektligji për KPM-në është miratuar mbi parimet e respektimit të plotë të direktivës AVMS, harmonizimit të këtij projektligji me legjislacionin në fuqi dhe sigurimit të zbatimit të të drejtave të garantuara e përgjegjësive të mveshura për të gjitha subjektet, nga një organ i pavarur kushtetutës.

“Direktiva e BE-së AVMS, shtrihet mbi dy parime kryesore: të siguruarit që çdo medium që prodhon informacion i nënshtrohet rregullave të njëjta dhe, që çdo qytetar ka të drejtë të informohet mbi atë se kush ia plason lajmin përmes të cilit informohet, marrë parasysh që gjykimet tona edhe formohen mbi lajmin që na plasohet”, ka deklaruar të enjten Qeveria e Kosovës.

“Kemi ruajtur pavarësinë e mediave nga ndikimi politik e çdo ndikim tjetër që mund të perceptohej si i tillë nga publiku. Së këndejmi, asnjë parti politike dhe asnjë bashkësi fetare nuk mund të ketë pronësi në media”, ka pretenduar mes tjerash ekzekutivi, pavarësisht vërejtjeve dhe sugjerimeve të BE-së që projektligji të ndryshohet për shkak të mospërputhjeve ligjore.

Shefi i Zyrës së BE-së në Kosovë, Tomas Szunyog, mas miratimit të projektligjit të kontestueshëm për KPM-në nga deputetët e Lëvizjes Vetëvendosje në pushtet, ka shprehur keqardhje që kuvendi  e miratoi ligjin “pa i përfshirë plotësisht rekomandimet e BE-së” në projektligjin për KPM-në, në mënyrë që ai të jetë në përputhje me standardet evropiane.

“Të udhëhequr nga ekspertët e BE-së e me vullnet për të fuqizuar KPM-në si institucion të pavarur kushtetues, por mbi të gjitha për t’i ofruar qytetarit të Kosovës mundësinë të krijojë opinionin në mënyrë të pavarur, gjithnjë sipas udhëzimeve të direktivës AVMS. Falenderojmë deputetët e Kuvendit të Republikës së Kosovës për votimin e një ligji cilësor e reformues”.

Partia Demokratike e Kosovës (PDK) dhe Lidhja Demokratike e Kosovës (LDK) – dy partitë kryesore opozitare në vend – kanë paralajmëruar se do ta dërgojnë ligjin për KPM-në në Gjykatën Kushtetuese, duke e cilësuar miratimin e një ligji të kontestuar edhe nga ndërkombëtarët “vazhdimësi e mentalitetit autoritar dhe antikushtetues” të qeverisë aktuale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.