BE-ja konfirmon se pranuan planin e Kurtit, por thonë se s’kemi parë hapa për de-eskalim

Nga Bashkimi Evropian në një përgjigjeje për Albanian Post kanë bërë me dije se Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, ka pranuar një letër të dërguar nga kryeministri i Kosovës, Albin Kurti, ku i ka paraqitur planin e tij pesë pikësh për de-eskalimin e situatës në Veri, të cilin e shpalosi këtë të marte në një konferencë për media.

“Konfirmojmë se Përfaqësuesi i Lartë Borrell ka marrë një letër nga kryeministri Kurti”, thanë nga BE, duke shtuar se “si gjithmonë, Përfaqësuesi i Lartë do të përgjigjet përmes kanaleve të duhura”, ka thënë për Albanian Post zëdhënësi i BE-së, Peter Stano.

Ndërkaq, Stano theksoi se deri më tani nuk kanë parë ndonjë hap “të vendosur dhe të menjëhershëm” nga Kurti të nevojshëm për deeskalim të situatës.

“Zhvillimet e fundit në Veri të Kosovës vetëm sa dëshmojnë se përshkallëzimi ende vazhdon, dhe kjo është në kundërshtim me interesin e Kosovës dhe të gjithë popullit në Kosovë”.

Po ashtu, ai potencoi se “ne ndamë me shtetet anëtare të BE-së një përmbledhje të masave që duhen marrë, nëse kryeministri Kurti nuk ndërmerr hapat adekuat dhe të menjëhershëm për të de-përshkallëzuar situatën dhe për të ulur tensionet”.

“Diskutimet midis vendeve anëtare të BE-së janë në vazhdim dhe Përfaqësuesi i Lartë Borrell është në kontakt të vazhdueshëm me liderët në rajon dhe të vendeve anëtare të BE-së”, përfundoi përgjigjejen e tij Stano.

Ndryshe, 12 ditë pasi shefi i diplomacisë evropiane, Josep Borrell, doli me tri kërkesa për Qeverinë e Kosovës, kryeministri Albin Kurti, ka ofruar si përgjigje pesë kërkesa të tij të cilat nuk janë të njëjta me ato të Borrell-it.

Derisa Borrell përmes një cicërime në Twitter tha se komuniteti ndërkombëtar pret “Zgjedhjet të reja në veri menjëherë, garantimi i pjesëmarrjes së serbëve të Kosovës dhe nisja e punës për themelimin e Asociacionit të Komunave me Shumicë Serbe”, Kurti ka deklaruar se s’bëhet asnjë nga këto, derisa të mos funksionoi fillimisht rendi dhe ligji në Veri të vendit.

Të përmbledhura pesë pikat e Kurtit janë që “Të sundojë ligji në Veri, të bëhet identifikimi dhe ndjekja penale e anëtarëve të bandave kriminale, këto grupe të tërhiqen nga Veriu, të bëhet sigurimi i terrenit bashkë me policinë, KFOR-in dhe EULEX-in dhe në fund të shapllet data e zgjedhjeve”.

“Kjo është oferta ime, unë pres përgjigje”, tha Kurti, duke deklaruar gjithashtu se do të donte takim gjatë kësaj jave në Bruksel me presidentin serb, Aleksandër Vuçiç.

Kjo konferencë e kryeministrit të Kosovës erdhi pas takimit me ambasadorët e Shteteve të Bashkuara të Amerikës, Britanisë së Madhe, Gjermanisë, Italisë dhe Francës dhe pas telefonatës me Josep Borrell, prandaj tashmë është e qartë se Kosova nuk e ka ndërmend të zbatojë atë që i është kërkuar nga ndërkombëtarët.

Nëse perëndimi nuk heq dorë nga kërkesat e veta, për këto të Kurtit atëherë do të kalohet në atë që ka paralajmëruar Borrell në Twitt-in e tij se “do të kenë pasoja serioze në marrëdhëniet tona me Kosovën”.

Kuri në fakt u pyet nga gazetarët për raportimin e Albanian Post rreth sanksioneve që mund të pasojnë për të, qeverinë e tij dhe Kosovën, por ai ka refuzuar të përgjigjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.