BE-ja i bën thirrje Listës Serbe të rishqyrtojë vendimin për bojkotimin e votimit në veri dhe regjistrimin e popullsisë

Bashkimi Evropian (BE) i ka bërë thirrje Listës Serbe që të rishqyrtojë vendimin për bojkotimin e votimit për shkarkimin e kryetarëve shqiptarë në katër komunat në pjesën veriore të Kosovës të banuar me shumicë serbe, ndërsa ka shprehur gjithashtu keqardhje edhe për thirrjen e këtij subjekti politik që serbët të bojkotojnë procesin e regjistrimit të popullsisë në Kosovë.

“Ne marrim në dijeni shqetësimet e shprehura nga serbët e Kosovës lidhur me procesin për zgjedhjet e reja. Përkundër kësaj, ne i bëjmë thirrje Listës Serbe të rishqyrtojë vendimin për të mos marrë pjesë, pasi demokracia nënkupton pjesëmarrje dhe realizimin e të drejtës për serbët e Kosovës që të shprehin qëndrimet e tyre në kutitë e votimeve”, u shpreh BE-ja.

Në një përgjigje dërguar mediave të hënën, blloku evropian ka konsideruar se është kyçe që të zhvillohen zgjedhjet lokale në katër komunat në veri të Kosovës – Mitrovicë e Veriut, Leposaviq, Zveçan dhe Zubin Potok – ndërsa e cilësoi “urgjente” pjesëmarrjen aktive të serbëve në insitucionet kosovare, posaçërisht në qeverisjen lokale, polici dhe gjyqësor në veri.

“Zhvillimi i zgjedhjeve të reja për kryetarë komunash duhet të sigurojë qeverisje të plotë përfaqësuese në veri dhe të ndihmojë edhe në uljen e tensioneve. Votimi për shkarkim është hap në këtë drejtim. Është imperative që të kthehemi në situatën ku serbët e Kosovës marrin pjesë aktive në qeverisjen lokale, polici dhe gjyqësorë në veri të Kosovës”.

BE-ja theksoi gjithashtu se është për keqardhje thirrja e Listës Serbe që serbët në Kosovë të mos marrin pjesë në regjistrimin e popullsisë, ekonomive familjare dhe banesave në Kosovë  – ngjarja më e rëndësishme statistikore e vendit – që filloi më 5 prill dhe pritet të zgjasë deri më 17 maj.

“Sigurimi i të dhënave më të reja për popullsinë ka rëndësi të veçantë pasi nuk është vetëm për të siguruar shpërndarjen e drejtë të mjeteve për komunat, por edhe për të ndihmuar në marrjen e informuar të vendimeve politike, planifikimet për shërbimet publike dhe adresimin e nevojave të ndryshme të grupeve të ndryshme demografike brenda popullatës”.

BE-ja ndër të tjera ka inkurajuar qytetarët që të marrin pjesë në regjistrimin e popullsisë, ndërkaq u ka bërë po ashtu thirrje institucioneve të Kosovës që të intensifikojnë fushatat informuese për të gjithë banorët, në mënyrë që të gjithë të kenë informacione të mjaftueshme për këtë proces.

SHBA-ja inkurajon serbët të marrin pjesë në regjistrimin e popullësisë, shprehet “e zhgënjyer” me thirrjet për bojkot të procesit

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.