BE-ja e demanton Osmanin: Ne ende insistojmë që hapja e urës të diskutohet në dialog

Bashkimi Evropian ka demantuar presidenten e Kosovës, Vjosa Osmani për çështjen e hapjes së urës kryesore mbi lumin Ibër për qarkullimin e automjeteve.

E bindur plotësisht Osmani, të dielën në një intervistë për Kallxo.com deklaroi se falë insistimit të saj tashmë komuniteti ndërkombëtar nuk po kërkon më që çështja e hapjes së urës kryesore që e bashkon Mitrovicën e Veriut me atë të Jugut të diskutohet në procesin e dialogut.

“Tash më nuk ka insistim që kjo çështje të shkojë në dialog me Serbinë për shkak të insistimit tim të vazhdueshëm edhe me BE-në edhe me NATO-n edhe me shtetet veç e veç që të bëhet dëm i jashtëzakonshëm nëse kjo dialogohet me Serbinë”, tha ajo.

Megjithatë në një përgjigje për Albanian Post, zëdhënësi i Bashkimit Evropian, Peter Stano, tha se hapja e urës duhet të diskutohet domosdoshmërisht në dialog.

“Hapja e urës është çështje e dialogut edhe pse Qeveria e Kosovës vepron në të kundërtën. Së bashku me partnerët tanë ndërkombëtarë, duke përfshirë NATO-n dhe KFOR-in, ne kundërshtojmë veprimin për të ndryshuar statusin aktual të urës pa koordinim dhe marrëveshje paraprake në Dialog”, tha ai për Albanian Post.

Osmani ndër të tjera në këtë intervistë potencoi se për këtë çështje s’ka çka pyetet Serbia, ndërsa shprehu besimin se gjatë këtij viti mund të ndodhë hapja e urës, meqë në vlerësimin e saj “nuk ka kërkesë që ta mbajmë urën të mbyllur gjithmonë, por ka kërkesë që momentin ta dakordojmë”.

Ndryshe edhe misioni i NATO-s në Kosovë, KFOR-i, ka ripërsëritur qëndrimin për hapjen e urës së Ibrit duke theksuar se një vendim i tillë paraprakisht duhet të diskutohet në procesin e dialogut e udhëhequr nga Bashkimi Evropian.

Një ripërtëritje e një qëndrimi të tillë erdhi pak orë pas kryeministri i Kosovës, Albin Kurti, tha se janë kryer të gjitha procedurat për hapjen e Urës, ndërsa tani po presin QUINT-in (SHBA-të, Mbretërinë e Bashkuar, Gjermaninë, Francën e Italinë) dhe KFOR-in.

KFOR-i ndër të tjera është përkujdesur të theksojë qe hapja e urës duhet të ndodh në koordinim me ndërkombëtarët.

“Për çështjen e hapjes së mundshme të urës së lumit Ibër në Mitrovicë për automjete, qëndrimi ynë ka qenë transparent dhe konsistent gjatë gjithë kohës. Çdo vendim në këtë drejtim duhet të merret përmes dialogut dhe në koordinim në kohë dhe efektiv me komunitetin ndërkombëtar“, thuhet në deklaratën e zëdhënësit të KFOR-it.

KFOR-i kërkon që vendimi për hapjen e urës së Ibrit të merret në dialog

Kurti të martën tha se Qeveria është e gatshme për hapjen e Urës mbi lumin Ibër, duke shtuar se po presin KFOR-in dhe QUINT-in.

Këto komente, Kurti i ka bërë në një prononcim për gazetarë nga Veriu, pasi që ka vizituar atë pjesë të Kosovës të martën, ku ka vënë gurthemelin e një stacioni policor në Leshak të Leposaviqit dhe ka qëndruar në Mitrovicë të Veriut.

“Po vazhdojnë konsultimet dhe koordinimet, por Qeveria me të gjitha dikasteret e saj është e gatshme që ta bëjë hapjen, po i presim QUINT-in e KFOR-in. Ne i kemi kryer punët tona, kemi bërë përgatitjet sa i përket pastrimit, mjedisit rrotull aty, edhe vlerësimit të qëndrueshmërisë në aspektin fizik dhe teknik”, ka thënë Kurti.

Kurti: Jemi gati për hapjen e Urës së Ibrit, por po e presim QUINT-in e KFOR-in

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.