“Bashkimi i Luginës me Kosovën, ideal i çdo shqiptari”, intervistë e Albanian Post me Kryetarin e Këshillit Kombëtar Shqiptar në Serbi

“Bashkimi i Luginës së Preshevës me Kosovë është ideal i çdo shqiptari”, ka thënë një intervistë për Albanian Post, Kryetari i Këshillit Kombëtar Shqiptar në Serbi (KKSH), Nevzad Lutfiu.

Kjo është ajo që shqiptarët që jetojnë në Serbi, të cilët përbejnë një nga komunitetet më të shtypura në Evropë, do të donin.

Në një rast tjetër, siç ka theksuar Lutfiu për AP, kërkojnë reciprocitet të të drejtave të shqiptarëve që jetojnë në Serbi me ato të serbëve që jetojnë në Kosovë.

Serbia i diskriminon sistematikisht shqiptarët që jetojnë atje, madje nuk ua lejon as përdorimin e flamurit kombëtar. Një nga çështjet që së fundmi është ngritur edhe në Senatin Amerikan është edhe pasivizimi i adresave, posaçërisht në Medvegjë.

“Këtu diskriminimi i ka kufijtë e racizmit, dhe kjo ndodh vetëm për një arsye: vetëm për shkak të përkatësisë sonë etnike”, ka theksuar Lutfiu.

Kreu i KKSH-së, i cili mban këtë pozitë që nga maji i këtij viti, që nga fillimi ka kërkuar që më patjetër Lugina e Preshevës të jetë pjesë e dialogut Kosovë-Serbi, të ndërmjetësuar nga Bashkimi Evropian.

Qëndrim të njëjtë, 8 muaj më pas, ka përsëri Lutfiu, madje thekson se këtë çështje ia ka shtruar edhe Kryeministrit të Kosovës, Albin Kurti, në takimet që ka pasur me të në këtë periudhë.

“Po, patjetër që e kemi paraqitur, dhe ai përveç që pajtohet, është deklaruar se duhet që të ketë reciprocitet të të drejtave, pra ato të drejta që serbët i gëzojnë në Kosovë t’i kenë edhe shqiptarët në Serbi”, potencoi ai, derisa shtoi se do të insistojë që çështja e shqiptarëve të Luginës të përfshihet në dialog.

Së fundmi Serbia pati një proces zgjedhor (17 dhjetor), në të cilin morën pjesë edhe shqiptarët. Në këtë proces zgjedhor, shqiptarët ishin të ndarë, garuan me dy lista, çka edhe arritën vetëm një deputet. Shaip Kamberi mori edhe një mandat si deputet i vetëm shqiptar në Parlamentin e Serbisë.

Në vlerësimin e Lutfiut, rezultati që arritën shqiptarët në këto zgjedhje është “jo i kënaqshëm”, dhe për këtë fajin e sheh tek ndarja që u krijua mes faktorëve politikë shqiptarë atje, derisa konsideron se Lugina “ka kapacitet për të fituar më shumë se një deputet”.

“Në parlamentin e shtetit, i cili po na diskriminon vetëm për shkak të përkatësisë etnike, ne duhet që të kemi sa më shumë zëra që flasin për ne, për të drejtat tona”, shtoi.

Në këtë intervistë për AP, Lutfiu ka folur edhe për projektet që ka bërë, por edhe për ato që ka në plan që t’i realizojë gjatë mandatit të tij në krye të KKSH-së.

Intervista e plotë e Albanian Post me Kryetarin e Këshillit Kombëtar Shqiptar në Serbi, Nevzad Lutfiu

Albanian Post: Ju kemi parë që nga zgjedhja e juaj si Kryetar i Këshillit Kombëtar Shqiptar në Serbi, keni organizuar shumë aktivitete për shqiptarët atje, mirëpo z. Lutfiu a mund të na tregoni se cilat kanë qenë projektet më të rëndësishme që ju si kryetar i KKSH-së i keni realizuar apo jeni në proces të realizimit përgjatë këtyre muajve sa jeni në krye të këtij institucioni?

Nevzad Lutfiu: 15 studentë të Luginës janë duke u shkolluar pa shpenzuar as edhe një cent, kjo falë angazhimit të Këshillit Kombëtar Shqiptar, kemi organizuar transportin për nxënësit që për vite kanë udhëtuar në këmbë nëpër mal, si dhe kemi realizuar aktivitete të ndryshme për ngritjen e cilësisë në arsim.

Ndër sukseset më të mëdha konsiderojmë dhe hapjen e zyrës së KKSH-së në Pazarin e Ri (kthimi i qytetarëve të këtij qyteti në identitet është shumë pozitiv, prandaj hapja e zyrës tonë është që t’i qëndrojmë afër), kemi filluar kursin e gjuhës shqipe për të të gjithë të rinjtë shqiptarë që jetojnë në Serbi, e në vendet ku jetojnë nuk kanë shkolla shqipe.

Albanian Post: Si e vlerësoni rezultatin e zgjedhjeve në Serbi, përkatësisht të shqiptarëve, dhe si i keni parë ndarjet që u krijuan mes faktorëve politikë shqiptarë në këtë fushatë zgjedhore?

Nevzad Lutfiu: Jo i kënaqshëm sepse Lugina ka kapacitet për të fituar më shumë se një deputet.

Si rezultat i ndarjes kemi rrezikuar të mos fitojmë asnjë përfaqësues.

Në parlamentin e shtetit, i cili po na diskriminon vetëm për shkak të përkatësisë etnike, ne duhet që të kemi sa më shumë zëra që flasin për ne, për të drejtat tona.

Uroj që në zgjedhjet e tjera të kemi një listë të shqiptarëve.

Albanian Post: Sa ka qenë e gatshme Kosova që të t’iu përgjigjet kërkesave tuaja gjatë kohës sa ju jeni në krye të KKSH-së?

Nevzad Lutfiu: Qeveria e Kosovës këtë vit ka financuar tekstet shkollore për nxënësit shqiptarë të shkollave fillore, që ka qenë një ndihmë e drejtpërdrejtë për familjet shqiptare. Gjithashtu ka financuar udhëtimin e disa liderëve të Luginës në Strasburg, ku liderët realizuan takime me eurodeputetë, të cilët i njoftuam me gjendjen e shqiptarëve në Serbi.

Albanian Post: Kohëve të fundit kemi parë se ka pasur prej atyre që, më në krye kryetarin e Preshevës Shqiprim Arifin, e kanë akuzuar kryeministrin Kurti se po i përçan shqiptarët në Luginë. Si qëndroni ju në këtë çështje, sa janë reale pretendimet e Arifit?

Nevzad Lutfiu: Këshilli Kombëtar Shqiptar ka komunikim të rregullt me Qeverinë e Kosovës. Secili institucion duhet patjetër të ketë komunikim të rregullt me Qeverinë e Kosovës, sepse kjo është në të mirë të qytetarëve tonë. Dallime mund të kemi, por bashkëpunimi dhe bashkërendimi me Kosovën, përveç që është i domosdoshëm, është edhe obligim kombëtar.

Albanian Post: Çka do t’i kërkonit Qeverisë së Kosovës dhe asaj të Shqipërisë për këtë vit, konkretisht çka presin shqiptarët e Luginës nga këto dy ekzekutive përkatëse?

Nevzad Lutfiu: Prezenca e dy shteteve duhet që të jetë evidente. Të jesh shqiptar në Serbi është sfidë. Këtë sfidë nuk mund ta përballojmë të vetëm pa mbështetjen e Kosovës dhe Shqipërisë.

Mbështetje në arsim, për bizneset lokale, për investime kapitale etj.

Albanian Post: Në një intervistë që ne e kemi pasur me ju, kur sapo ishit zgjedhur kryetar i KKSH-së, kishit thënë se Lugina e Preshevës me patjetër duhet të jetë pjesë e dialogut Kosovë-Serbi. Mirëpo, ja ku jemi tash, muaj pas kësaj interviste tuaj, nuk ka diçka konkrete. Ajo çka do të ishte më rëndësi të dimë nga ju është se a ia keni shtruar këtë çështje kryeministrit Kurti, gjatë takimeve që i keni pasur me të, dhe nëse po cili ka qenë qëndrim i tij?

Nevzad Lutfiu: Po, patjetër që e kemi paraqitur, dhe ai përveç që pajtohet, është deklaruar se duhet që të ketë reciprocitet të të drejtave, pra ato të drejta që serbët i gëzojnë në Kosovë t’i kenë edhe shqiptarët në Serbi.

Ne besojmë që çështja e shqiptarëve të Luginës do të përfshihet në dialogun Kosovë-Serbi, për këtë do të insistojmë.

Albanian Post: Është i pamohueshme fakti që Serbia i diskriminon sistematikisht shqiptarët që jetojnë atje, dhe në bazë të asaj që shohim nuk pritet ndonjë përmirësim në këtë drejtim. Si e shihni ju një zgjidhje ideale për shqiptarët e Luginës, a mund të jetë shkëmbimi i territoreve ndoshta opsioni më i mirë, dhe cili është qëndrimi i juaj për këtë ide?

Nevzad Lutfiu: Bashkimi i Luginës me Kosovë është ideal i çdo shqiptari, madje ky ideal është shprehur përmes referendumit të 1-2 marsit të vitit 1992, ku shqiptarët në tërësi iu përgjigjen këtij referendumi.

Në rastin tjetër kërkojmë reciprocitet të të drejtave, pra ato të drejta që Serbia i kërkon për serbët në Kosovë, t’i gëzojmë edhe ne këtu.

Këtu diskriminimi i ka kufijtë e racizmit, dhe kjo ndodh vetëm për një arsye: vetëm për shkak të përkatësisë sonë etnike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.