Bashkëqeverisja, Rama: Një Shqipëri e re në aspektin e shërbimeve, titulli i pronësisë në telefon

Kryeministri i Shqipërisë, Edi Rama, në vijim të takimeve sensibilizuese, për sa i përket Bashkëqeverisjes si Ligj i Ri, të premten e 10 dhjetorit është ndalur në Shkodër.

Nga ky qytet Rama tha se, “sot kemi një Shqipëri të re në aspektin e shërbimeve”.

Numri një i qeverisë theksoi se Kadastra do të digjitalizohet komplet dhe synimi i kësaj është vetëm për faktin që, “pronësia të vijë në telefon ose kompjuter, pa pasur nevojë të shkoni në zyrat e shtetit”.

Rama dhe njëherë ritheksoi se nëse, “deri më sot qytetarët për të marrë një shërbim kanë qenë të detyruar të shkojnë në zyra të tjera për të plotësuar dosjet, kjo punë tanimë do të kryhet nga punonjësit e zyrave të shtetit”.

Ndër të tjera ai bëri të ditur për çdo kërkesë që qytetari nuk ka marrë përgjigje nga administrata, punonjësi përgjegjës do të sanksionohet financiarisht, përveç asaj administrativisht ose penalisht.

Nga ana tjetër, drejtoresha e Agjencisë Kombëtare të Shoqërisë së Informacionit, Linda Karçanaj, iu drejtua qytetarëve se, “2.3 milionë persona kanë llogari në e-albania dhe marrin shërbimet që duan”.

Po ashtu brenda vitit të ardhshëm Karçanaj tha se prindërit mund të shikojnë notat dhe mungesat e fëmijëve të tyre nëpërmjet e-albania dhe mos të jenë të detyruar të shkojnë në shkollë në takimet me prindërit.

“Janë shkurtuar 766 vite pritje në radhën e zyrave të shtetit dhe janë kursyere 6.5 milionë euro në xhepat e tyre”, vijoi Drejtoresha e AKSHI-t.

Pavarësisht se ligji është kthyer nga Presidenti i Republikës, Ilir Meta, Rama theksoi se do të miratohet ashtu siç është nga Parlamenti.

Kreu e qeverisë e mbylli duke thënë se, “kur qytetari aplikon për shërbim dhe shërbimi nuk i jepet në kohë sipas afatit ligjor, qytetarit i lind e drejta të drejtohet në platformën ‘Shqipëriaqëduam.al’ dhe duke denoncuar faktin”.

Më 2 dhjetor Rama takimin e parë sensibilizues e zhvilloi në Elbasan.

Sipas ligjit, Agjencia, në bashkëpunim me institucionin e administratës shtetërore, heton kryesisht të gjitha faktet dhe vlerëson të gjitha rrethanat e nevojshme për kontrollin e veprimtarisë administrative, të administratës shtetërore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.