Shqipëria

Bashkëqeverisja ndalet në Lezhë, Rama: 95% e shërbimeve kryhen përmes sistemit e-Albania


Kryeministri i Shqipërisë, Edi Rama, në vijim të takimeve sensibilizuese për “Ligjin e Bashkëqeverisjes”, të premten e 17 dhjetorit është ndalur në Lezhë.

“95% e shërbimeve mund të kryhen online përmes portalit qeveritar e-Albania, vetëm 5% kanë nevojë për prezencë fizike në administratën shtetërore – p.sh., martesat”, bëri me dije Rama.

Ky është takimi i katërt për prezantimin e këtij mekanizmi të ri detyrues ligjor. Kjo ka ardhur për ta çliruar qytetarin nga pesha e administratës.

Ligji ka të bëjë me dhënien e plotë të aksesit në shërbimet administrative përmes smartphone-it apo kompjuterit dhe e përball administratën me pasojat e çdo vonese në shërbimin ndaj qytetarit.

Gjatë takimeve në Elbasan, Shkodër dhe Berat, kryeministri ka theksuar se të gjitha sportelet në administratën shtetërore do të mbyllen brenda vitit 2022.

Numri një i qeverisë ka thënë se Kadastra do të digjitalizohet komplet dhe synimi i kësaj është vetëm për faktin që, “pronësia të vijë në telefon ose kompjuter, pa pasur nevojë të shkoni në zyrat e shtetit”.

Ndër të tjera, ai bëri të ditur për çdo kërkesë që qytetari nuk ka marrë përgjigje nga administrata, punonjësi përgjegjës do të sanksionohet financiarisht, përveç asaj administrativisht ose penalisht.

Nga ana tjetër, drejtoresha e Agjencisë Kombëtare të Shoqërisë së Informacionit, Linda Karçanaj, iu është drejtuar qytetarëve se, “2.3 milionë persona kanë llogari në e-Albania dhe marrin shërbimet që duan”.

Drejtoresha e Agjencisë Kombëtare të Shoqërisë së Informacionit, Linda Karçanaj

Sipas ligjit, Agjencia, në bashkëpunim me institucionin e administratës shtetërore, heton kryesisht të gjitha faktet dhe vlerëson të gjitha rrethanat e nevojshme për kontrollin e veprimtarisë administrative, të administratës shtetërore.

Kujtojmë se, dy ditë më parë, Komisioni i Ligjeve rrëzoi dekretin e Presidentit të Republikës, Ilir Meta, për “Lligjin e Bashkëqeverisjes”, duke e rikthyer në Kuvend për votim.

Pro dekretit votuan vetëm tre anëtarë të komisionit, Oerd Bylykbashi, Dashnor Sula dhe Erisa Xhixho. Ndërkohë, të gjithë deputetët e mazhorancës kanë votuar kundër, duke e rrëzuar atë.

Pas kthimit nga Presidenti i Shqipërisë, Ilir Meta të ligjit për “Bashkëqeverisjen”, ka pasur debat në Komisionin Parlamentar për Çështjet Ligjore, ndërmjet këshilltarit ligjor të presidentit, Bledar Dervishaj dhe ministres së Shtetit për Marrëdhëniet me Parlamentin, Elisa Spiropali.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore