Basha lajmëron rekurs në Gjykatën e Lartë për vulën, por nuk përjashton krijimin e një partie të re
Lulzim Basha ka bërë rekurs në Gjykatën e Lartë për vulën e partisë, pasi më 11 qershor, Gjykata e Apelit ia dha atë grupimit të Sali Berishës, duke i kthyer legjitimitetin kreut demokrat.
Pavarësisht kësaj, gjatë një fjale për media, Basha nuk e përjashtoi faktin se ai mund të garojë me një parti të re në zgjedhjet parlamentare të vitit 2025.
Sipas Bashës, vula e PD nuk mund t’i jepet një grupimi (grupi i Berishës) që është kundër aleatëve perëndimorë të Shqipërisë. Lulzim Basha tha gjithashtu se grupimi i tij politik do jetë në zgjedhje dhe se shqiptarët do kenë alternativë për të votuar.
“Shqiptarët do të kenë alternativën e tyre dhe alternativën e tyre do ta kenë tek ne. Vendimi i 11 qershorit është tërësisht i padrejtë dhe do bëjmë rekurs. Nuk kemi marrë akoma vendim për parti të re”, tha ai.
Më tej, shtoi se beson se PD duhet të kthehet aty ku duhet të jetë dhe vendi i PD është në vlerat me të cilat ka lindur.
“Nuk mundet PD të jetë kundër aleatëve, përmes rekursit PD do t’ju kthehet demokratëve, për të bërë një betejë me Ramën. Berisha nuk është zgjidhja për të larguar Ramën. Përmes rekursit, do kërkojmë që PD të kthehet tek vlerat”.
Po ashtu, ai ka bindjen se Berisha nuk e mund dot Ramën dhe nuk do të arrijë as të realizojë ndryshimin që shumica e shqiptarëve kërkon.
“Edi Rama po e përdor Sali Berishën si gogolin që do mbledhë votat, mjeran që kërkon të mbajë pushtetin”, përforcoi Basha.
Në vijim ai tha se Berisha vendosi interesin e tij mbi atë të demokratëve, por edhe vetë Sali Berisha e ka të qartë se nuk e mund dot Edi Ramën.
“Ne duam të bashkojmë të gjithë shqiptarët që duan ndryshimin në Shqipëri, duam ti bashkojmë nën logon e PD-së, ndaj edhe do të bëjmë rekursin. Ka tre vjet që debati është marrë peng nga diskutimet për vulën dhe logon, është një debat që është marrë peng nga Qeveria. Nuk ka pikë rëndësie se me çfarë logosh dhe vulash do paraqitet alternativa jonë, edhe pse preferoj që të jenë me ato të PD-së”, shtoi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
