Mijëra pako me afat të skaduar të medikamenteve janë duke qëndruar në Barnatoren Qendrore të Qendrës Klinike Universitare të Kosovës (QKUK).

Njëri nga këto ilaçe i cili vështirë gjendej në Kosovë gjatë periudhës së pandemisë COVID-19, aktualisht mund të gjendet në Barnatoren Qendrore të QKUK-së, por me afat të skaduar.

Drejtoresha e kësaj barnatore, Dardane Mehaj në një përgjigje për Radio Evropën e Lirë ka thënë se njëra nga dhomat e Barnatores Qendrore ka një numër të madh të pakove me këtë medikament.

“Unë nuk kam qenë këtu atëkohë, por është një dhomë me produktin Remdesivir, me rreth 7 mijë njësi”, ka deklaruar Mehaj.

Gjatë vizitës së REL-it në këtë barnatore, kanë qenë disa dhoma me barna me afat të skaduar, të vendosura shumë pranë barnave të përdorshme me vetëm një perde në mes.

Megjithatë, drejtoresha e barnatores ka thënë se ato janë të sigurta.

“Stoqet që i kemi pasur në klinika, i kemi deponuar këtu. Është një numër i caktuar, nuk mund ta them me shifra. Nuk e di saktë as cilat barna janë, por vlen të theksohet se një produkt, që në kohë të pandemisë ka qenë vështirë të sigurohet, gjendet këtu në stok me afat të skaduar”.

Teksa ka theksuar se barnat dhe materialet e tjera medicinale me afat të skaduar janë grumbulluar për tash e gati 15 vjet.

Nga Ministria e Shëndetësisë kanë deklaruar se kanë formuar tashmë një grup punues për asgjësimin e mbetjeve mjekësore.

“Grupi e ka për obligim hartimin e kritereve për asgjësimin e këtyre mbetjeve medicinale dhe pas përfundimit të kësaj çështjeje, do të fillohet me aktivitetin e prokurimit”, thuhet në përgjigjen me shkrim.

Ndryshe, që nga paslufta në Kosovë, asnjëherë spitalet publike në Kosovë nuk kanë arritur ta përmbushin listën esenciale të barnave 100 për qind. Si rrjedhojë, vazhdimisht ka pasur mungesë të tyre dhe pacientët detyrimisht janë obliguar që gjatë trajtimit t’i blejnë vetë ato.