Barcelona nuk mund të paguaj për Ferran Torres

Ferran Torres dhe Barcelona kanë arritur marrëveshje personale, por marrëveshja me City-n në këto momente duket e pamundur.

Futbollisti është shprehur ditëve të fundit shumë i lumtur për interesin e Barcelonës.

Sipas gazetës katalunase, Sport, Ferran Torres është i gatshëm që të pranojë uljen e pagës vetëm që të kthehet në Spanjë.

Kjo për shkak se te Manchester City, Ferran nuk po gjen minutat që priti të kishte.

Këtë sezon futbollisti e ka nisur shumë mirë, por lëndimi që pësoi në ndeshjen me Italinë e detyroi spanjollin që të mbyll vitin 2021.

Ai pritet që të kthehet në fushën e blertë në gjysmën e muajit janar.

Barcelona ka shprehur interesim për të, dhe gjatë të enjtes, drejtuesit e klubit katalunas, më saktësisht zv. Presidenti Mateus Alemany, vizituan zyrat e klubit anglez.

Fillimisht u mendua se Barcelona nga City do të kërkonte shërbimet e Raheem Sterling, por kjo nuk ndodhi.

Lojtari i City-t të cilin bluagranët dëshirojnë ta kenë në dispozicionin është Ferran Torres.

Madje, klubi ka arritur marrëveshje me lojtarit, por ata nuk mund t’i paguajnë anglezëve atë që kërkojnë.

Qytetarët për shërbimet e Ferran Torres kërkojnë 70 milionë euro, shifër kjo që është e pamundur për Barcelonën në çdo mënyrë.

Katalunasit propozuan huazim me detyrim blerjeje në fund të sezonit për 40 milionë euro, shifër kjo që Manchester City menjëherë e refuzoi.

Dëshira e futbollistit mund t’i ulë skuadrat në bisedime përsëri, por për momentin, transferimi i Ferran Torres në “Camp Nou”, duket thuajse i pamundur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.