Biznes

Bankman-Fried i FTX ka dhënë shuma të mëdha parash për republikanët


Rënia e kripto-miliarderit Sam Bankman-Fried është përshkruar si një goditje e madhe për partinë Demokratike.

Kandidatët e saj kanë qenë përfituesit kryesorë.

Por në një intervistë të fundit, Bankman-Fried ka pohuar se ai ka dhënë shuma po aq të mëdha parash edhe për republikanët.

“Kam dhuruar për të dyja palët. Dhurova përafërsisht të njëjtën shumë për të dyja palët”.

Ai ka shtuar se të gjitha donacionet e tij ndaj republikanëve ishin “të errëta”, duke iu referuar donacioneve që nuk bëhen publike.

“Arsyeja nuk ishte për çështje rregullatore, por për shkak se gazetarët nervozohen ndaj donacioneve për republikanët. Ata janë të gjithë super liberalë dhe nuk doja ta nisja atë luftë”.

Donacionet e pazbuluara të Bankman-Fried janë bërë të mundura nga vendimi i Gjykatës Supreme i vitit 2010 në çështjen Citizen’s United, që lejoi donatorët të japin në mënyrë anonime dhe ka çuar në derdhjen e më shumë se 1 miliard dollarëve në zgjedhjet federale që nga viti 2010.

Sakaq, zbulimi i fundit vjen teksa një betejë politike mbi kolapsin e FTX, shkëmbimi i kriptove të Bankman-Fried, po formohet në Washington.

Ai ka qenë donatori i dytë më i madh për politikanët demokratë në ciklin e fundit zgjedhor.

Të enjten Senati do të mbajë seancën e parë në një seri seancash për rënien e FTX, me republikanët të prirur të bëjnë demokratët përgjegjës për mungesën e mbikëqyrjes.

Themeluesi i FTX ka dhënë më shumë se 990 milionë dollarë për kandidatët në ciklin e fundit zgjedhor dhe 38.8 milionë dollarë të tjerë për grupet e jashtme.

Dhe vetëm 235 mijë dollarë nga donacionet e tij publike politike kanë shkuar për kandidatët republikanë.

Ndërkohë, partitë e kanë ndihmuar Bankman-Fried të pozicionohej si një zë me ndikim në rregullimin e kriptove në Washington.

Marrë nga “The Guardian”, përshtatur për “Albanian Post”.

Sam Bankman-Fried u kërkon falje ish-punonjësve të FTX për kolapsin

/Albanianpost.com


Lajmet kryesore