Bankat ulin raportin e kredive me probleme në vitin 2023, tregon raporti i Bankës së Shqipërisë

Një pjesë e madhe e bankave tregtare, kanë arritur që gjatë vitit 2023, të ulin raportin e kredive me probleme.

Kështu reflektojnë të dhënat e fundit të Bankës së Shqipërisë, të cilat tregojnë se në shtatë banka të nivelit të dytë, është arritur të ulet raporti i kredive me probleme gjatë vitit 2023, ku në anën tjetër për katër prej tyre, ky raport është rritur.

Raportin më të lartë të kredive me probleme për vitin 2023, sipas të dhënave nga BSH-ja, e kishte Banka e Bashkuar e Shqipërisë (UBA), në nivelin 11.4%. Megjithatë, ky tregues është përmirësuar ndjeshëm nga niveli prej 17.6% i vitit 2022.

Vitin e kaluar, UBA ka nisur zbatimin e një plani të ri biznesi, pas marrjes së kontrollit nga kompania e sigurimeve Eurosig. Plani synon zgjerimin e rrjetit të degëve, të shërbimeve të ofruara dhe rritjen e aktiveve të bankës.

Nga ana tjetër, banka më raportin e dytë më të lartë të kredive me probleme është Credins Bank. Por, edhe Credins e ka përmirësuar këtë tregues në 6%, nga 6.8% që kishte qenë një vit më parë. Credins është banka më e madhe kredituese e ekonomisë shqiptare dhe sipas Bankës së Shqipërisë zotëronte 20% të portofolit aktiv të kredisë për ekonominë në fund të 2023.

Ndjek me një ndryshore të papërfillshme Raiffeisen Bank, e cila në fund të vitit 2023 kishte një raport të kredive me probleme në nivelin 5.9%. Megjithatë, në rastin e Raiffeisen raporti i kredive me probleme ka shënuar rritje nga niveli prej 5.3% i një viti më parë. Raiffeisen është banka e dytë më e madhe kredituese e ekonomisë, me 16.8% të totalit.

Union Bank në fund të vitit 2023 kishte një raport të kredive me probleme në nivelin 5.8%, në rënie të ndjeshme nga niveli prej 6.3% që raportohej në fund të vitit 2022.

Banka e fundit që ka një raport të kredive me probleme më të lartë se niveli mesatar i sektorit është Banka OTP Albania. Njëkohësisht, OTP është edhe banka, e cila raportoi rritjen më të lartë të këtij treguesi në 2023, duke arritur në 5.5%, nga 3.6% që ishte në fund të vitit 2022. Kjo rritje vjen pas një cikli disavjeçar rritjeje të shpejtë të portofolit të kredisë, por edhe në vijim të bashkimit me Alpha Bank Albania. OTP Albania është banka e tretë më e madhe kredituese e ekonomisë shqiptare, me 13.8% të portofolit total në fund të 2023.

Një tjetër bankë, e cila ka ndjekur një strategji të rritjes së shpejtë të kreditimit pas ndryshimit të pronësisë është Tirana Bank. Kjo rritje e shpejtë duket se ka sjellë efektet e para në drejtim të rënies së cilësisë së portofolit të huasë. Raporti i kredive me probleme në fund të vitit 2023 u rrit në 4.6%, nga 4.2% që kishte qenë një vit më parë.

Ndërkohë, një tjetër bankë me rritje të shpejtë në vitet e fundit, Fibank, ka raportuar ulje të ndjeshme të raportit të kredive me probleme. Ky raport zbriti në 4.4% në fund të 2023, nga 6.3% që kishte qenë një vit më parë.

Banka më e madhe në vend, Banka Kombëtare Tregtare, në fund të vitit të kaluar raportoi një ulje të mëtejshme të raportit të kredive me probleme në 3.3%, nga 4% që kishte qenë një vit më parë. Megjithëse zotëron pothuajse një të katërtën e aktiviteteve të sektorit bankar, pjesa e BKT në portofolin total të kredisë është shumë më e ulët, me 13.2%, duke u renditur si banka e katërt kredituese ekonomisë.

Vijon Banka Intesa Sanpaolo Shqipëri, me një raport të kredive me probleme në nivelin 2.8%, në rritje nga niveli prej 2.2% i një viti më parë.

ProCredit Bank Shqipëri në fund të vitit 2023 raportonte një nivel të kredive me probleme prej 2.3%, në rënie nga raporti prej 3.1% i një viti më parë.

Për të dytin vit radhazi, banka me nivelin më të ulët të kredive me probleme është Banka Amerikane e Investimeve (ABI Bank), në nivelin 1.2% në fund të vitit të kaluar. Edhe ABI Bank e ka ulur raportin e kredive me probleme nga niveli prej 2.1% i një viti më parë.

Sipas shifrave zyrtare të Bankës së Shqipërisë, raporti i kredive me probleme vitin e kaluar zbriti në 4.74%, në rënie me 0.26 pikë përqindje krahasuar me një vit më parë. Në vlerë absolute, kredia me probleme zbriti në nivelin 35 miliardë lekë, me një rënie prej afërsisht 2% krahasuar me një vit më parë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.