Qeveria e Kosovës, të martën ka pranuar financim nga Banka Botërore për koston e Projektit të Emergjencës së Kosovës, COVID-19 përmes së cilës synon që të nis renovimin në klinikën e Gjinekologjisë dhe Urologjisë.
Lajmi është bërë i ditur përmes një komunikate për media nga Ministria e Shëndetësisë.
“Qeveria e Kosovës ka marrë financim nga Banka Botërore për koston e Projektit të Emergjencës së Kosovës Covid-19 dhe financimin shtesë dhe synon të aplikojë një pjesë të të ardhurave për pagesat sipas kontratës për punët e rinovimit në dy klinika (Gjinekologji dhe Urologji)”, thuhet në komunikatën e MSH-së.
Po ashtu, ministri Arben Vitia të martën ka kumtuar lajmin se kanë siguruar edhe tri vaksina të reja për mbrojtjen e shëndetit të qytetarëve.
Vitia, përmes një shkrimi në rrjetin social ‘Facebook’ ka thënë se tri vaksinat kanë qëllim mbrojtjen e shëndetit të qytetarëve.
“Vaksinat e siguruara janë: vaksina HPV, kundër kancerit të qafës së mitrës, vaksinën kundër rotavirusit, vaksinën kundër pneumokokut e meningjitit”.
Ai ka shtuar se, “pas një dekade përditësuam kalendarin e vaksinimit, gjashtëfishuam buxhetin për vaksina, shtuam buxhetin për mbrojtje e parandalim”.
Jo rrallë herë pacientët kthehen nga Qendra Klinike Universitare e Kosovës (QKUK) pa marrë shërbimet e nevojshme.
Në nëntor të vitit të kaluar, vetëm pse pati reshje më të shumta, instituti më i madh shëndetësor në Kosovë u detyrua të anulojë operimet për një kohë.
Shiu kishte depërtuar brenda, për shkak të infrastrukturës së dobët brenda klinikave.
Rregullimi i klinikave bëhet çdo vit, prandaj edhe për njohësit e shëndetësisë është absurde që QKUK-ja vazhdon të përballet me problematika të tilla.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
