Baloni i motit ngjitet në 5300 metra përpara se temperatura të bjerë në 0 gardë mes valës së të nxehtit

Një balonë zvicerane e motit duhej të ngjitej në një lartësi të paprecedentë përpara se temperatura të binte në 0 gradë Celsius.

Kështu kanë thënë meteorologët, pasi një valë e nxehtë e vonë e verës dhe zjarret vazhdojnë të godasin pjesë të Evropës kontinentale.

Një burrë u gjet i vdekur në një zjarr që shpërtheu në veri të Athinës të hënën, ndërsa qeveria greke paralajmëroi për një rrezik ekstrem zjarri në të gjithë vendin.

Kurse më shumë se gjysma e Francës kontinentale u vendos nën një alarm të nxehtësisë.

MétéoSuisse ka thënë se vija e gradës zero – lartësia në të cilën temperatura bie nën zero, e konsideruar si një tregues kyç meteorologjik veçanërisht në rajonet malore – u mat në 5 mijë e 298 metra gjatë natës.

Shifra, e cila u regjistrua nga një balonë meteorologjike e fluturuar nga Payerne në Zvicrën perëndimore, përbënte “një rekord që nga fillimi i monitorimit në vitin 1954”, dhe tejkaloi lartësinë e mëparshme prej 5 mijë e 184 metrash që ishte vendosur në korrik të vitit të kaluar.

Linja 0 gradë “ndikon në vegjetacionin, vijën e borës dhe ciklin e ujit, kështu që ka një ndikim të konsiderueshëm në habitatet e njerëzve, kafshëve dhe bimëve”, sipas MétéoSuisse.

Ajo kishte mesatarisht 2 mijë e 570 metra mbi nivelin e detit nga viti 1991 dhe 2020, duke u luhatur midis 1 mijë dhe 2 mijë metra në dimër dhe 3 mijë dhe 4 mijë metra në verë.

Në dekadat e fundit “ndryshimi antropogjen i klimës ka bërë që lartësia e vijës zero gradë të rritet ndjeshëm në çdo sezon”, ka thënë shërbimi, duke vënë në dukje se rekordet e njëpasnjëshme për treguesin ishin vendosur të gjitha në 10 vitet e fundit.

Sakaq, ekspertët kanë thënë se një zonë e jashtëzakonshme e presionit të lartë në të gjithë Evropën kontinentale me qendër mbi Alpe ka krijuar një kube nxehtësie që parashikohet të shtyjë temperaturat në nivele rekord ose afër rekordeve në disa rajone të paktën deri të mërkurën.

Një tjetër zjarr i egër shpërtheu në ishullin Evia të hënën, ndërsa zjarret gjithashtu vazhduan të digjen jashtë kontrollit për të tretën ditë në Greqinë verilindore pranë qytetit port të Alexandroupolis, me 12 komunitete të evakuuara gjatë fundjavës.

Ministri i Mbrojtjes Civile, Vasilis Kikilias, ka bërë thirrje për “vigjilencë ekstreme publike” në mbarë vendin.

Në Spanjë, agjencia shtetërore e motit, Aemet, ka vendosur pesë provinca në rajonin jugor të Andalucisë në alarm të nxehtësisë, duke paralajmëruar se temperaturat parashikohen të rriten në më shumë se 40 gradë rreth Seviljes, Kordobës dhe në luginën e Guadalquivir.

Në Ishujt Kanarie, zjarrfikësit luftuan një zjarr jashtë kontrollit në Tenerife, i cili ka detyruar më shumë se 12 mijë njerëz të largohen nga shtëpitë e tyre dhe ka djegur më shumë se 8 mijë e 400 hektarë pyll me pisha.

Në Francë priten temperatura rekord në luginën e Ronës, ndërsa temperaturat do të arrijnë kulmin të martën dhe të mërkurën.

Pesëdhjetë nga 96 departamentet kontinentale të vendit ishin në alarm të nxehtësisë, me disa që pritet të vendosen në një paralajmërim maksimal të kuq gjatë ditëve të ardhshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.