Balla: Zgjatja e afatave të vettingut jo politike, por emergjente

Kryetari i Grupit Parlamentar i Partisë Socialiste, Taulant Balla, në një prononcim për mediat të hënën e 8 nëntorit, pas takimit me reporteren për Shqipërinë në Parlamentin Evropian, Isabel Santos, u shpreh se vizita e saj në Tiranë përkon me një moment të rëndësishëm për vendin.

“Kjo vizitë vjen në një moment të rëndësishëm, nëse kemi parasysh publikimin nga Komisioni Evropian të progres raportit, që i ka hapur dritën jeshile për mbajtjen e konferencës së parë ndërqeveritare, edhe pse kjo në mënyrë të pandershme është ndërlidhur me zgjidhjen e ngërçit mes Bullgarisë dhe Maqedonisë së Veriut”.

Ai theksoi se Shqipëria do të vijojë përpjekjet për t’i çuar përpara reformat.

“Për nevojën e dakordësisë të të gjitha palëve, për zgjatjen e afateve të vettingut deri në 2024, nuk duhet të jetë kurrsesi një çështje politike. Jemi në kushtet e një nevoje emergjente që palët të bien dakord”.

Balla foli gjithashtu për abstenimin që bëri deputeti Fatmir Xhafaj në Këshillin e Legjislacionit, ku mazhoranca votoi propozimin për t’iu drejtuar për opinion Komisionit të Venecias, lidhur me zgjatjen e afateve të institucioneve të vettingut.

“Nuk ka mungesë dakordësie, Xhafaj është një ndër ata njerëz që ka dhënë kontribut në reformën në drejtësi. Kemi pasur diskutim edhe së bashku si kryetar grupi. Ai mendon se Venecia e ka pasur një opinion për këtë”.

Zgjatja e mandatit të vetting-ut

Ishte data 15 tetor, kur Partia Socialiste depozitoi në Kuvend kërkesën për zgjatjen e mandateve të vetting-ut.

Kjo erdhi pasi afatet e komisioneve të vetting-ut përfundojnë pesë vite nga momenti i funksionimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.