Shqipëria

Balla ripohon mbajtjen e Konferencës Ndërqeveritare me parlamentarin gjerman


Kryetari i Grupit Parlamentar të Partisë Socialiste, Taulant Balla ka ripërsëritur se gjatë javës së ardhshme do të mirëpritet Konferenca e Parë Ndërqeveritare mes BE-së me Shqipërinë dhe Maqedoninë e Veriut.

Lajmi u bë i ditur nga përfaqësuesi socialist në median sociale Facebook.

Balla priti në një takim në Kryesinë e Kuvendit, Anëtarin e Bundestag-ut gjerman dhe përfaqësuesin e socialdemokratëve, Metin Hakverdi.

Sipas tij, konteksti i ri gjeopolitik pas agresionit të pajustifikuar dhe të paprovokuar rus kundër Ukrainës imponojnë një marrëdhënie më të ngushtë të Bashkimit Europian me vendet e Ballkanit Perëndimor.

Kjo e fundit, kërkon edhe një përshpejtim drastik të procesit të anëtarësimit.

Gjatë takimit Balla i ka shprehur mirënjohjen Hakverdi-t dhe partisë simotër gjermane për mbështetjen dhe vëmendjen ndaj Shqipërisë.

“Do të intensifikojmë bashkëpunimin mes dy grupeve tona parlamentare”, ravijëzoi në përmbyllje Balla.

Balla e konfirmoi fillimisht nga foltorja e Kuvendit mbajtjen e Konferencës Ndërqeveritare mes Shqipërisë dhe BE-së.

“Kërkova fjalën për të ndarë një lajm të rëndësishëm sa i përket rrugëtimit tonë drejt anëtarësimit në BE, që ka të bëjë me faktin se ka një dakordësi të plotë mes 27 vendeve anëtare për të mbajtur javën e ardhshme Konferencën e Parë Ndërqeveritare mes Shqipërisë dhe BE-së”, tha Balla.

Ai theksoi se dakordësia politike tashmë është arritur dhe mbajtja e Konferencës Ndërqeveritare javën e ardhshme është fakt.

Këtë fakt e paralajmëroi më 26 qershor Albanian Post, duke cituar një burim diplomatik ndërkombëtar.

“Ka një mundësi por është zbehur, pasi maqedonasit duan t’i bëjnë një amendim të vogël propozimit francez”, sqaronte zyrtari ndërkombëtar në kushte anonimiteti për AP-në.

Sipas burimit, nëse Bullgaria e pranonte ajo do të miratohej në margjinat e Samitit të Nato-s në Madrid.

“Nëse Bullgaria nuk e pranon, RMV-ja do e refuzojë, pra do jetë Maqedonia e Veriut ajo që nuk do pajtohet me propozimin”, ravijëzonte në përmbyllje zyrtari ndërkombëtar i cili ishte pjesëmarrës në samit.

/Albanianpost.com


Lajmet kryesore