![](https://albanianpost.com/wp-content/uploads/2024/05/lena-3-696x463-1.jpg)
Deputetja e Lidhjes Demokratike të Kosovës, Hykmete Bajrami, i ka reaguar ministres së Drejtësisë, Albulena Haxhiu, e cila ka ironizuar me opozitën lidhur me temën e zgjedhjeve dhe shpërndarjen e Kuvendit duke e quajtur “ministre të skandaleve” dhe “ministre të vettingut të dështuar”.
Bajrami, përmes një shkrimi në rrjetin social ‘Facebook’, ka kërkuar nga pushteti dorëheqje, pasi që tashmë është fakt sipas saj që kanë dështuar.
“Pasi i dështoi nisma shefit të saj për ta instrumentalizuar tërë opozitën, Albulena Haxhiu e skandaleve me djegien e Institutit të Mjekësisë Ligjore, ministrja e vettingut të dështuar sërish e paska nis fushatë me video kundër opozitës”.
“Albulena Haxhiu në pamundësi të shkruajë e flasë për ndonjë sukses të Qeverisë, ajo prodhon video pasi i dështoi partia të çojë vendin në zgjedhje duke u viktimizuar”, ka shkruar Bajrami.
Sipas Bajramit, prodhimi i videove nuk e largon pushtetin nga premtimet që ka dhënë dhe dështimet që ka shënuar.
“Që keni dështuar prej ndërtimit të çerdheve e deri te mashtrimet për përfundimet e projekteve nacionale si rruga për Podujevë, Mitrovicë e Gjilan”.
“Prodhimi i videove nuk ju largon nga përgjegjësia që i keni mashtru pensionistët, veteranët dhe invalidët e luftës. Prodhimi i videove nuk ju largon nga përgjegjësia që keni mashtru se nuk bisedoni me Vucicin pa kërku falje Serbia”.
Ajo tutje ka përmendur edhe kontratat njëburimore të nënshkruara nga Lëvizja Vetëvendosje.
“Prodhimi i videove nuk ju largon nga përgjegjësia që keni nënshkru 240 milionë euro kontrata njëburimore me korrupsion. Prodhimi i videove nuk ju largon nga keqpërdorimi i rezervave shtetërore”.
“Prodhimi i videove nuk ju amniston nga mafia energjetike e ambasadorit Martin Berishaj. Prodhimi i videove nuk ju largon nga përgjegjësia që e keni pranu Zajednicën. Prodhimi i videove nuk ju largon nga përgjegjësia që i keni mashtru banorët e Deçanit se nuk zbatoni vendimin për Manastirin e Deçanit”.
Ndër të tjera, ka përmendur edhe dështimin e Kosovës për t’u anëtarësuar në Këshillin e Evropës.
“Prodhimi i videove nuk ju amniston nga dështimi për t’u anëtarësuar në Këshillin e Evropës. Prodhimi i videove nuk ju largon nga përgjegjësia që keni dështuar të sjellni njohje të Shtetit të Kosovës. Zero njohje për tri vjet e gjysmë”.
Duke shtuar se, “me mashtrime, me gënjeshtra, me propagandë e keni marrë pushtetin. Mirëpo, qytetarët po kërkojnë llogari dhe projekte, e premtimet që i keni dhënë”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com