Avokati i Veselit dhe Thaçit kundërshtojnë dokumentet e paraqitura në Speciale: Prokuroria u shërbye me prova nga shërbimi sekret i Serbisë

Avokati i ish kryeparlamentarit të Kosovës, Kadri Veselit, Ben Emmerson, gjatë prezantimit të një dokumenti gjatë dëshmisë së njërit dëshmitar ka deklaruar se është dokument i dhënë nga autoritetet serbe.

Emmerson, ka thënë se kjo provë si e tillë duhet kundërshtuar nga mbrojtja dhe duhet të identifikohet për vërtetësinë e saj.

“Pra, ndër provat materiale shoqëruese, që lidhen me shënim përgatitor është një dokument që i është treguar dëshmitarit gjatë seancës përgatitore, që është një dokument qartazi i dhënë nga autoritetet serbe ndonëse ju keni dhe origjinalin edhe përkthimin në anglisht”.

“Por, është pjesë e së njëjtës kategori me dokumentet që kemi kundërshtuar sa i takon të dhënave që janë futur nga shërbimi sekret serb përpara se të jepej dëshmia në TPNJ, në Ish-Tribunalin e Hagës. Dhe sikurse e dini, një nga këto dokumente është shënuar për identifikim sepse duhet diskutuar ende mes palëve dhe duhet të dalim me parashtrimet konkrete”.

“Sa i takon dokumentit tjetër, është një dokument që është pranuar, por megjithatë është edhe ky dokument që është objekt debati gjyqësor dhe ne kemi kërkuar që Trupi Gjykues që ta riklasifikojë sepse edhe ky është i shënuar për identifikim”, tha Emmerson

Ai ka theksuar se në të njëjtin material ka edhe shenime të cilat tregojnë se janë dhënë nga shërbimi sekret serb.

Edhe avokati i ish presidentit të Kosovës, Hashim Thaçit, Gregory Kehoe, ka kundërshtuar dokumentet të cilat janë paraqitur në Speciale.

Sipas tij, të njëjtat nuk janë paraqitur nga Zyra e Prokurorit të Specializuar.

“Ne parashtrojmë që këto dokumente nuk janë paraqitur nga ZPS-ja, ashtu siç thuhet”, ka deklaruar Kehoe.

Edhe më 9 nëntor, derisa po përfundote seanca e së hënës në Gjykatën Speciale ku po dëshmonte ish-gazetari i mediumit serb, Tanjug, Nebojsha Radosheviç, avokati i Kadri Veselit, Ben Emmerson, ka ngritur një rast që nëse vërtetohet përbën një nga skandalet më të mëdha prejse ka filluar seancat Specialja.

Emmerson tregoi se në shënimet përgatitore për dëshmitarin e radhës është vërejtur se ai ka tentuar të negociojë me Prokurorinë një pako përfitimi për të, në këmbim të dëshmisë.

Avokati po ashtu kishte thën5 se vërehet se aty dallohet një zyrtar i prokurorisë teksa i sugjeron dëshmitarit mundësi përfitimi në këmbim të dëshmisë.

Skandal në Speciale/Avokati Emmerson zbulon se si një dëshmitar negocioi me prokurorinë pako përfituese për të në këmbim të dëshmisë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.