Lajme

Autoritetet kineze, në luftë të ashpër me krimin kibernetik


Kur Jenny Fan mori një telefonatë në fillim të shkurtit, ajo mendoi se kishte fituar një lotari, por në fakt ra pre e një mashtrimi.

Jenny-t, studente në vitin e dytë në kolegjin në provincën veriore kineze të Hebei-t, ju tha nga përfaqësuesi i një kompanie për kujdesin e lëkurës, se do të kompensohej me plot 1 mijё Renminbi (117 paund) për një blerjen e një kremi që nuk i kishte rezultuar efektiv.

“Ai më dha të gjitha detajet e blerjes, përfshirë edhe një fotografi të faturës së transaksionit, kështu që e pata të vështirë të mos i besoja”, thotë Fan.

Për të përfituar dëmshpërblimin, studentja duhet t’i dërgonte burrit numrin e llogarisë, ku t’i kalonte shuma.

Por, nё vend tё parave, “përfaqësuesi” ia bllokoi atё, po ashtu edhe nga rrjetet sociale dhe nuk iu pёrgjigj mё telefonatave tё saj.

Në kërkim të një përgjigjeje

Jenny shkoi në polici, por e vetmja pёrgjigje qё mori ishte se u tregua shumё budallaqe qё ra pre e mashtrimit.

“Ata më thanë se paratë ishin zhdukur përgjithmonë, pasi mashtruesit online ishin të vështirë për t’u gjetur”, tha ajo.

Studentja është mes dhjetëra mijëra qytetarëve kinezë që kohët e fundit bien viktimë e mashtrimit kibernetik.

Krimi është kthyer në problematik në ekonominë e dytë më të madhe në botë.

“Dita-ditës po shohim një rritje të mashtruesve, ndërsa ekonomia po rritet”, tha Nie Chengtao, avokat me bazë në Pekin, i specializuar në mashtrimet kibernetike.

Skemat e mashtrimit financiar në Kinë

Skemat financiare kanë një histori të gjatë të lulëzimit në Kinë, ku dekada të tëra rritjeje ekonomike kanë krijuar jo vetëm të ardhura më të larta, por edhe një mentalitet të pasurimit të shpejtë.

Mashtruesit kanë përfituar gjithashtu nga mungesa e rregulloreve dhe një tavan i vendosur nga shteti në normat e depozitave.

Kjo e ka bërë mё tё lehtё bindjen e klientëve, të cilët janë gjithmonë të prirur pёr të marrë një vlerë më të lartë nga kursimet e tyre.

Mashtruesit gjithnjë e më tepër synojnë klientët e platformave, pasi ata janë në gjendje të aksesojnë shumë më tepër viktima të mundshme.

Ekspertët, nga ana tjetër, thonë se askush nuk është i imunizuar nga mashtruesit.

“Ne të gjithë kemi pika të dobëta, nga të cilat mund të përfitojnë”, thonë ata.

Problemi, jo lehtësisht i zgjidhshëm

Ndërsa Pekini ka bërë një shtysë të madhe për t’i vënë mashtruesit pas hekurave dhe numri i arrestimeve vjetore është pesëfishuar gjatë tre viteve të fundit, një numër i konsiderueshëm mashtruesish kanë dalë të padëmtuar.

Ata veprojnë jashtë vendit, duke fshehur identitetin e tyre me teknologji më të avancuar.

Një fushatë arsimore mbarëkombëtare kundër mashtrimit u nis nga autoritetet kineze në vitin 2019, pasi presidenti Xi Jinping njoftoi në një konferencë se lufta kundër mashtrimit ishte një “prioritet kryesor” kur bëhej fjalë për sigurinë e popullit.

Fushata kulmoi në fillim të këtij viti, me përurimin e “Qendrës Kombëtare Kundër Mashtrimit”, aplikacion që është shkarkuar më shumë se 500 milionë herë, duke e bërë atë një nga më të njohurit në botë.

Qeveria përdor një sërë metodash, nga posterat e rrugëve, te reklamat televizive, për të informuar publikun sesi duken mashtrimet dhe si t’i shmangen ato.

Autobusët gjithashtu janë pajisur me reklama udhëzuese, ndërsa ekranet LED shfaqin njerëz të famshëm që propozojnë një “luftë” kundër krimit kibernetik.

Disa vende madje kanë shkuar edhe më tej.

Muajin e kaluar, Dongjing, një vendbanim në Shangai, filloi t’u kërkonte mysafirëve të hoteleve që të lexonin dhe nënshkruanin fletët e këshillave kundër mashtrimit, përpara qëndrimit në hotel.

Grupet e synuara

Një nga përfituesit kryesorë të synuar të nismës së politikave janë studentët e kolegjit, që kanë vuajtur shumë nga mashtrimet financiare.

Një sondazh i vitit të kaluar, me 2 mijё e 746 studentë të universitetit në mbarë vendin nga “Kina Youth Daily”, tregoi se më shumë se një e dhjeta e të anketuarve kishin humbur para nga mashtruesit.

Kjo nxiti një valë të re fushatash arsimore, që synonin t’i bënin të rinjtë më të kujdesshëm. Vitin e kaluar, Shangai filloi t’u kërkonte 140 mijё studentëve të parë të kolegjit që të ndiqnin një kurs online kundër mashtrimit.

Investitorët me pakicë janë një tjetër objektiv kryesor për nxitjen e arsimit, pasi njohuritë e tyre financiare nuk arrijnë të mbajnë ritmin me pasurinë në rritje të familjes.

Një sondazh, me 140 mijё të rritur nga Banka Popullore e Kinës në prill, zbuloi se më shumë se gjysma e të anketuarve nuk mund të llogaritnin kthimet vjetore dhe nuk e kuptonin se çfarë do të thoshte diversifikimi i investimeve.

44% thanë se i injoronin ose lexonin vetëm kontratat financiare.

Autoriteti u ka kërkuar gjithashtu këshilltarëve financiarë dhe menaxherëve të aseteve që t’i bëjnë investitorët të plotësojnë testet e vlerësimit të rrezikut të regjistruara në video përpara se të vendosin se cilat produkte do të shesin.

Shumë investitorë me pakicë supozojnë një kthim të garantuar për produktet e investimeve me të ardhura fikse, edhe pse kjo nuk ekziston në realitet.

Një dështim mund të nxisë investitorët e pakënaqur të padisin menaxherët e aseteve për dhënien e informacionit mashtrues.

Megjithatë, fushata edukative flitet nuk ka arritur dot të parandalojë lulëzimin e mashtrimeve.

Të dhënat e gjykatës tregojnë se vitin e kaluar rastet e mashtrimit të investitorëve në mbarë vendin u rritën me më shumë se një të tretën nga nivelet e vitit 2019.

Avokatët kundër mashtrimit, thonë se mungesa e mbrojtjes së informacionit personal i lejon mashtruesit të krijojnë mesazhe të tilla të personalizuara që viktimat e kanë të pamundur t’i rezistojnë.

Marrë nga Financial Times, përshtatur për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore