Asociacioni – pas anëtarësimit në Këshill të Evropës, thotë Osmani

Presidentja e Kosovës, Vjosa Osmani, duke komentuar letrën e tre liderëve të shtetit drejtuar raportueses për Kosovën në Këshillin e Evropës (KiE), Dora Bakyoannis, ku u dhanë garanci për themelimin e Asociacionit të Komunave me Shumicë Serbe, tha se ky është një zotim që buron nga marrëveshjet në kuadër të dialogut për normalizimin e marrëdhënieve Kosovë-Serbi.

“S’është përkushtim i marsit 2024, por i marrëveshjes bazike të vitit 2023 që është pranuar nga delegacioni i Kosovës”, theksoi presidentja Osmani para gazetarëve pas konferencës së organizuar nga Universiteti i Prishtinës (UP) për nder të 25-vjetorin e ndërhyrjes së NATO-s, duke shtuar se tash ky është një obligim i Kosovës që shteti duhet ta zbatojë pas anëtarësimit në KiE.

“Ajo çka është me rëndësi është që ka qenë edhe kërkesë e imja që në letër të përfshihet një pjesë ku çdo detyrim i Kosovës të zbatohet në përputhje me të drejtën kushtetuese – ligjet, kushtetutën dhe aktgjykimet e Gjykatës Kushtetueses të Kosovës. Pra kjo është korniza jonë dhe nuk dalim kurrsesi jashtë saj”, deklaroi ndër të tjera shefja e shtetit kosovar.

Kryeministri i Kosovës Albin Kurti dhe Presidenti i Serbisë Aleksandar Vuçiç supozohet se e pranuan marrëveshjen për rrugën drejt normalizimit më 27 shkurt 2023 në Bruksel të Belgjikës. Në një mënyrë elegante u pranua themelimi i Asociacionit të Komunave me Shumicë Serbe në Kosovë, duke siguruar “një nivel adekuat të vetëmenaxhimit” për komunitetin serb.

Komisioni për Çështje Politike dhe Demokraci i KiE-së do të shqyrtojë të mërkurën (sot, 27 mars) raportin e Bakoyannis. Kosova aplikoi për anëtarësim në KiE në maj të vitit 2022, por mos zbatimi i vendimit të Gjykatës Kushtetuese për Manastirin e Deçanit ishte bërë pengesë që vendi i vogël ballkanik të vazhdojë rrugëtimin drejt anëtarësimit në këtë organizatë.

Ndryshe, do të duhen 2/3 e votave në Asamblenë Parlamentare të KiE-së (APKE), ku marrin pjesë deputetët nga parlamentet e shteteve anëtare, për t’i rekomanduar Këshillit të Ministrave që ta ftojë Kosovën të bëhet anëtarja më e re e KiE-së. Kjo, nëse gjithçka shkon sipas planit, pritet të ndodhë gjatë samitit që pritet të mbahet në mes të muajit maj në Islandë.

Këshilli i Evropës shqyrton raportin për anëtarësimin e Kosovës

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.