“Asociacioni i Komunave Evropiane të Kosovës”, do të jetë ky emri i ri i Asociacionit?

Asociacionit të Komunave me Shumicë Serbe, thotë për Albanian Post një diplomat që është i përfshirë thellë në përpilimin e udhërrëfyesit për implementimin e pikave të Marrëveshjes për Rrugën drejt Normalizimit ndërmjet Kosovës dhe Serbisë, mund t’i ndryshojë emërtimi, pasi palët të pajtohen ta bëjnë për arsye marketingu.

Asociacioni i Komunave Evropiane te Kosovës, mund të jetë emri i ri i Asociacionit, tregon më tej burimi ndërkombëtar për Albanian Post, duke nënvizuar faktin se rëndësia juridike e këtij riemërtimi është zero, kjo për arsye se vendimi i Gjykatës Kushtetuese nuk e ka ndaluar, apo kontestuar pagëzimin e këtij mekanizmi si “Asociacioni/Bashkësia e Komunave me Shumicë Serbe” të arritur me Marrëveshjen e vitit 2023.

“Nëse hipotetikisht, në çastin e fundit, palët do të binin dakord që të riemërtojnë Asociacionin/Bashkësinë në, p.sh. ‘Asociacioni i Komunave Evropiane të Kosovës’ (Association of European Municipalities), ose ‘Bashkësia e Komunave Evropiane të Kosovës’ (Community of European Municipalities), apo ‘Associacioni Evropian i Komunave të Kosovës’ (European Association of Kosovo Municipalities), politikisht, kjo gjë do të ishte një zhvillim shumë pozitiv”, thotë fillimisht burimi për Albanian Post.

Shtesa si “evropian” nuk do të ishte hera e parë të përdorej në një riemërim të ndonjë vendi me status më të veçantë. Ka ndodhur më parë në Evropë.

Siç shpjegon burimi për AP, “një pajtim i tillë i mundshëm do të ndiqte shembullin e Alzasit në Francë”.

Është shumë interesante, por që nga viti 2021, emërtimi zyrtar i Alzasit është “Collectivité européenne d’Alsace” (Kolektiviteti europian i Alzasit), si mishërimi i vlerave moderne të këtij komuniteti, që me shekuj ishte shkak konflikti në mes të Gjermanisë dhe Francës.

Burimi ndërkombëtar, tregon më tej se serbët kanë të drejtë juridikisht të kërkojnë që mekanizimi i cili do t’i bashkonte dhjetë komunat që banohen me shumicë nga serbët në Kosovë, të emërohet ashtu siç është pagëzuar në vitin 2013.

“Duhet theksuar që Gjykata Kushtetuese nuk e ka ndaluar dhe as nuk e ka kontestuar emërtimin zyrtar ‘Asociacioni/Bashkësia e komunave serbe’. Gjykata vetëm ka theksuar që struktura organizative e Asociacionit/Bashkësisë duhet të reflektojë dhe të respektojë parimin kushtetutës të diversitetit etnik të komuniteteve që jetojnë në këto komuna”, ka thënë burimi i përfshirë në proces, për Albanian Post.

“Rrjedhimisht, kërkesat për ndryshimin e emërtimit zyrtar janë tërësisht politike dhe nuk kanë mbështetje kushtetuese”, thekson burimi, duke shtuar se “Qeveria e Kosovës nuk ka të drejtë juridike që ta kërkojë ndryshimin e emërtimit zyrtar dhe do të ishte mirë që këto manipulime me emërtimin zyrtar të marrin fund”.

Përkundër mos-domosdoshmërisë së ndryshimit të emrit, për shkak se ka cilësorin “shumicë serbe”, është bërë shumë shpesh polemikë rreth emrit, por në qarqet diplomatike kjo quhet vetëm si “abuzim i palëve, Kosovës dhe Serbisë me emrin e Asociacionit/Bashkësisë”.

Në diskursin publik serb, qëllimshëm përdoret emërtimi “Zajednica Srpskih Opstina”, shkurt ZSO (shqip “Bashkësia e Komunave Serbe”.

Ky emërtim është përqafuar edhe nga elemente politike në Kosovë, përfshirë edhe kryeministrin aktual Albin Kurti.

Por, sipas burimit, partia e këtij të fundit “e ka përdorur këtë emërtim të gabuar për të ndërtuar një narracion negativ kundrejt Asociacionit/Bashkësisë”.

Pasi – shpjegon burimi – “e vërteta është që ZSO nuk është emri i vërtetë i asaj që duhet të themelohet”.

“Nëse e lexoni me kujdes marrëveshjen e vitit 2013, si dhe parimet e themelimit nga viti 2015, do të shihni që emërtimi zyrtar është ‘Asociacioni/Bashkësia e komunave më shumicë serbe’. Cilësimi ‘komunë serbe’ nuk është i barasvlershëm me ‘komunë me shumicë serbe’. Kryeministri Kurti ka të drejtë kur thotë që në Kosovë, ligjërisht, nuk ka komuna serbe, shqiptare, turke, boshnjake, malazeze apo rome”, komenton burimi i AP-së zhvillimin rreth emrit të Asociacionit/Bashkësisë.

Se a do të ketë emër të ri për Asociacionin/Bashkësinë do të kuptohet pas 18 marsit, kur për ta implementuar këtë pikë, por edhe 10 të tjera, Albin Kurti dhe Aleksandër Vuçiç takohen në Ohër të Maqedonisë Veriore me synim pajtimin.

Aktualisht, një ekip i madh ekspertësh, po punon në hartimin e rrugës që mundëson zbatimin e asaj që u arrit pajtim me 27 shkurt në Bruksel. Ndërmjetësuesi i Bashkimit Evropian, Miroslav Lajçak, nga e enjtja qëndron për katër ditë në Prishtinë e Beograd, për të prezantuar punën për udhërrëfyesin dhe modifikimet e fundit. Ai pret të marrë edhe një pajtimet në parim për mënyrën e implementimit të pikave të marrëveshjes.

Ndërsa, takimi i të shtunës së 18 marsit do të tregojë nëse ia ka vlejtur e gjitha.

Ekskluzive: Emri i Asociacionit mund të ndryshohet vetëm për çështje marketingu – emërimin aktual s’e ka kontestuar as Gjykata Kushtetuese, serbët kanë të drejtë ligjore ta përdorin

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.