Agjencia e Statistikave të Kosovës (ASK), në konferencën e së hënës ka njoftuar se Komuna e Dragashit ka kërkuar që procesi i regjistrimit të popullsisë që përfundon më 17 maj, të shtyhet.

Drejtori i ASK-së, Avni Kastrati, ka thënë se po diskuton me këto komunë për ta mbështetur stafin dhe procesin që të shtyhet.

“Dragashi ka sfidë me komunitete ka disa zona që kanë refuzuar me fillim të regjistrohen dhe besoj që edhe në Dragash do të kryhet me kohë”, tha Kastrati.

Sipas të dhënave që posedon ASK-ja deri tani janë regjistruar mbi 1 milionë e 420 mijë banorë.

“Ne do t’i shqyrtojmë ato kërkesa dhe do të shikojmë nëse ka ndonjë bazë, arsye të mirë që të shtyhet”, tha Kastrati.

Sipas tij, procesi “po shkon mirë”, duke shtuar se “regjistrimi do të përfundojë gjatë kësaj jave në të gjitha komunat e Kosovës”.

Ndërsa, sa i përket diasporës ai tha se deri tani janë regjistruar mbi 400 mijë pjesëtarë.

Gjobat e ASK-së

Agjencia e Statistikave të Kosovës (ASK) ka paralajmëruar se personat që vendosin të mos regjistrohen mund të përballen me gjoba të parashikuara me ligj nga 30 deri në 2 mijë euro.

Gjobat për biznesmenët janë edhe më të larta dhe shkojnë deri në 20 mijë euro.

Regjistruesit e kanë për obligim të shkojnë në të njëjtën ekonomi familjare tre herë, në rast se në dy herët e para nuk arrijnë të takojnë qytetarin për t’i marrë informatat për regjistrim.

Gjatë vizitës regjistruesit janë të detyruar të lënë një njoftim se kanë ardhur dhe nuk kanë gjetur askënd.

Ligjet do të ekzekutohen nga gjykatat dhe Policia e Kosovës.