“As që e kam ditur se do ketë rregullore për dinarin”, si u distancua Kurti nga vendimi që e prezantonte si “sukses” para militantëve

E paraqiti me pompozitet para anëtarëve të partisë së tij, por edhe para qytetarëve, mirëpo befasisht Kryeministri i Kosovës, Albin Kurti, tani po thotë se nuk qenë në dijeni të vendimit të Bankës Qendrore të Kosovës (BQK), për ndalimin e dinarit serb për pagesa në territorin e Kosovës.

Kurti, këtë e bëri në një intervistë për radion/revistën “Monocle”, që është regjistruar në Konferencën e Sigurisë në Mynih të Gjermanisë, që u mbajt javën e kaluar.

“Më 27 dhjetor të vitit të kaluar Banka Qendrore e Kosovës ka marrë vendim për këtë rregullore të re, për t’i luftuar aktivitetet e paligjshme… dhe bënë mirë. Nuk kisha ide se do ta sjellin këtë vendim, apo se do ta hartojnë këtë rregullore (për ndalimin e dinarit)”, deklaroi Kurti.

Mirëpo, më 4 shkurt, Kurti që kishte pasur mbledhje me Qendrat e Lëvizjes Vetëvendosje, duke folur për “sukseset” që kjo parti është duke i bërë në qeverisjen e vendit, e kishte përmendur edhe ndalimin e dinarit serb.

Kjo tërheqje e Kurtit, duke ia lënë përgjegjësinë vetëm BQK-së, vjen në një kohë kur vendet perëndimore – si kurrë më parë – posaçërisht Shtetet e Bashkuara të Amerikës, kanë artikuluar kritika të ashpra ndaj tij për shkak të moskoordinimit me ta për këtë çështje.

Madje, zyrtarë të lartë amerikanë, përfshirë Ndihmës-Sekretarin e Shtetit për Evropë dhe Euroazi, James O’Brien, kanë bërë të ditur se ky vendim ka cenuar raportet në mes të dy shteteve.

Ndryshe, vendimi i BQK-së që në Kosovë të përdoret vetëm një valutë, euro, aktualisht ka ngecur në mes thirrjes së komunitetit ndërkombëtar që i njëjti të shtyhet deri në një afat më optimal, pasi shteti serb tha se vendimi i Kosovës afekton serbët e Kosovës, meqë ata i pranojnë të gjitha ndihmat nga Serbia në dinarë dhe, në anën tjetër, arsyetimin e autoriteteve kosovare se vendimi një fjalë është vetëm zbatim i një dispozite të Kushtetutës së Kosovës dhe asgjë tjetër.

Ndërkombëtarët kanë kërkuar që kjo çështje të zgjidhet në dialogun e ndërmjetësuar nga Bashkimi Evropian, gjë që është refuzuar kategorikisht nga Kosova

Madje, zëvendëskryeministri, Besnik Bislimi, njëherit kryengociator i Kosovës, ka bërë të ditur se ka refuzuar një ftesë që i është bërë nga Përfaqësuesi Special i BE-së për dialogun Prishtinë-Beograd, Miroslav Lajçak, për të diskutuar mbi këtë tematikë.

Refuzimin për të marrë pjesë në takim, Bislimi e ka arsyetuar duke thënë se çështja e dinarit “nuk është pjesë e dialogut”.

“Ka kërkesë nga Brukseli që të mbahet një takim javën e ardhshme për çështjen e rregullimit të transferit të monedhave nga Serbia për Kosovë, por ky nuk është takim ku duhet të shkojë kryenegociatori, për arsye se çështja e dinarit nuk është pjesë e dialogut”, deklaroi Bislimi të mërkurën e 22 shkurtit.

Përveç refuzimit, Bislimi edhe ka akuzuar ndërmjetësin Lajçak, për caktimin e një takimit, sipas tij, në mënyrë të njëanshme, pasi që ka theksuar se nuk është koordinuar si zakonisht për agjendën e takimit.

“Kësaj radhe mendoj që ai i ka shkelë parimet të cilat i ka vendosur vetë, për arsye që është hera e parë që ka caktuar një takim pa dakordim me palët dhe është munduar që të përcaktojë edhe agjendën, përkundër parimit që ai ka vendosur në vitin 2021 që asnjë temë nuk vendoset në agjendë pa dakordim të palëve”, ka shtuar Bislimi.

Kosovës mund të udhëtojë për në Bruksel, gjithmonë në bazë të asaj që e ka deklaruar Bislimi, vetëm kur të kërkohet nënshkrimi i Marrëveshjes Bazike (Bruksel, më 27 shkurt, Ohër, më 18 mars).

“Unë shkoj atëherë kur diskutohet për Marrëveshjen Bazike, kështu që do të shohim se kush mund të shkojë që të bisedojë për çështjen e dinarit, por që nuk është nga ekipi i kryenegociatorit”, potencoi ai.

Bislimi, ndër të tjera, ka bërë të ditur se Qeveria e Kosovës në ditët në vijim do të dalë me një listë prej 10 masave, të cilat do të tregojnë se si serbët duhet të veprojnë për t’u mos u dëmtuar nga faza kalimtare e zbatimit të Rregullores së re të Bankës Qendrore të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.