As Gërvallës s’i mjafton shpjegimi i Osmanit, kërkon “hetim të plotë” nga maqedonasit

Ministrja e Punëve të Jashtme dhe Diasporës së Kosovës, Donika Gërvalla-Schwarz, nëpërmjet një postimi në “Facebook” të hënën, ka thënë se pret institucionet e Maqedonisë së Veriut “hetim të plotë dhe të paanshëm” për incidentin diplomatik në aeroportin e Shkupit, ku u përfshi presidentja kosovare, Vjosa Osmani, incident që presidenca e cilësoi “sulm” ndaj vendit.

“Pashmangshëm, diskutuam edhe për incidentin e fundit në Aeroportin e Shkupit, me ç’rast përsëritëm shqetësimin e institucioneve tona rreth incidentit dhe nevojën e domosdoshme për një hetim të plotë dhe të paanshëm nga institucionet e Maqedonisë së Veriut për t’u siguruar që situata të tilla të mos përsëriten kurrë”, ka shkruar kryediplomatja kosovare.

Presidenca e Kosovës ka akuzuar Maqedoninë e Veriut për shkelje të praktikave ndërkombëtare dhe Konventën e Vjenës për Marrëdhënie Diplomatike, duke thënë se gjatë 1 gushtit, presidentes Osmani është tentuar t’i merret telefoni nga një anëtar i sigurimit të aeroportit. Megjithatë, ky version duket se nuk është besuar plotësisht nga qeveria e Kosovës.

Pas takimit në Shkup me kryeministrin maqedonas, Hristijan Mickoski, gjatë një konference të përbashkët për shtyp, kryeministri i Kosovës, Albin Kurti, ka refuzuar ta cilësojë incidentin “sulm” dhe “provokim” ndaj Kosovës, duke thënë se “nuk e di” që institucionet kosovare kanë pasur një qëndrim të tillë dhe këtë mund ta ketë thënë ndonjë qytetar i zakonshëm.

“Situata e djeshme në Aeroportin e Shkupit nuk mund të shpjegohet e as të vlerësohet ndryshe, përveçse si një provokim i pastër dhe tendencë për të shkaktuar incident”, ka deklaruar Presidenca e Kosovës më 2 gusht. Por, pavarërisht qëndrimit të presidencës, kreu i ekzekutivit ka thënë ndryshe: “Do të ketë një raport zyrtar që do ta zbardhë këtë çështje”.

Ndryshe, në qeverinë e Maqedonisë së Veriut nën udhëheqjen e VMRO-DMNE-së bën pjesë edhe koalicioni i partive shqiptare “VLEN” që u mbështet hapur nga kryeministri i Kosovës kundër Bashkimit Demokratik për Integrim (BDI). Kosova dhe Maqedonia e Veriut nuk kanë pasur incidente të kësaj natyre në kohën kur në koalicionin qeverisës ka qenë BDI-ja.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.