Arsenal, lëvizje të shumta në merkato

Skuadra angleze e Arsenal-it është hedhur në merkato në dy fronte, largime dhe afrime. Deri më tani, topçinjtë kanë bërë disa largime dhe po synojnë të largojnë edhe lojtarë të tjerë, për t’u bërë vend transferimeve të reja.

Arsenal-i ka larguar Matteo Guendouzi-n dhe William Saliba-n, duke i dërguar në huazim te Marseille, David Luiz-i ka përfunduar kontratën, ndërsa Martin Odegaard-i dhe Dani Ceballos-i pas përfundimit të periudhës së huazimit në “Emirates Stadium” janë rikthyer te Real Madrid-i.

Nga ekipi i Mikel Arteta-s pritet të largohet edhe Hector Bellerin-i. Spanjolli është pranë kalimit në Serine A, te skuadra e Inter-it.

Granit Xhaka është një tjetër emër “i nxehtë” në merkaton në dalje të Arsenal-i.

Xhaka kërkohet me ngulm nga Roma, por për të ka interes edhe nga Inter-i, PSG-ja dhe Juventus-i.

Alexandre Lacazette ka edhe një vit kontratë dhe nëse do t’i gjejnë një destinacion, klubi do ta lejojë largimin e tij, për t’u lënë vend elementëve të rinj në skuadër.

Për t’u larguar janë edhe Lucas Torreira dhe Sead Kolasinac-i, të cilët janë rikthyer në Londër, pasi kanë përfunduar periudhën e huazimit, përkatësisht tek Atletico Madrid-i dhe Schalke 04.

Për sa i përket merkatos në hyrje, Arsenal-i ka kryer transferimet e para. Talenti i Anderlecht-it, Albert Sambi Lokonga është lojtari më i ri në “Emirates Stadium”.

21-vjeçari aktivizohet në qendër të mesfushës dhe ishte një sugjerim i legjendës së Arsenal-it, Thierry Henry-s. Ai u kushtoi arkave të klubit 17.5 milionë euro.

Gjithashtu, topçinjtë kanë afruar edhe talentin 21-vjeçar, portugezin Nuno Tavares-in. Tavares erdhi nga Benfica për shifrën e 8 milionë eurove. Ai aktivizohet në krahun e majtë të mbrojtjes.

Mbrojtësi i Brighton-it, Ben White, është shumë pranë kalimit tek ekipi i Arteta-s. Për 23-vjeçarin, topçinjtë janë të gatshëm të ofrojnë deri në 50 milionë euro.

Sulmuesi i Chelsea-t, Tammy Abraham, shihet si zëvendësuesi i duhur i francezit Lacazette. 23-vjeçari kushton rreth 40 milionë euro.

Dëshira e madhe e Arsenal-it për ta transferuar në merkaton e verës mbetet Manuel Locatelli. Lojtari i Sassuolo-s dëshiron kalimin te Juventus-i përpara topçinjve, por këta të fundit kanë ofruar 40 milionë euro te Sassuolo, 10 milionë më shumë se Juventus-i.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.