Policia e Kosovës ka njoftuar se është arrestuar një i dyshuar për djegjen e veturave në Veri të Kosovës.
“Policia e Kosovës, në vazhdën e luftës kundër krimit të organizuar, parandalimit të veprave kriminale dhe arrestimit të kryerësve të veprave penale, ka arrestuar një person të dyshuar, i cili kërkohej mbi dyshimin e bazuar për përfshirje në disa vepra penale”, thuhet në njoftim.
“I njejti, gjithashtu është i dyshuar edhe për djegjen e veturave në rajonin e Zubin Potokut, të cilat ishin regjistruar në targa të Republikës së Kosovës”.
Ndërkaq, në njoftimin e Policisë thuhet se i dyshuari është i nacionalitetit serb, dhe i njëjti është arrestuar rreth orës 17:00.
“Arrestimi i të dyshuarit mashkull kosovar i nacionalitetit serb (M. B. 1987), është kryer sot rreth orës 17:00, pas hetimeve intenzive të kryera nga njësitet relevante policore”.
Përveç djegjeve të veturave, policia njofton se i dyshuari akuzohet edhe për përfshirje në rastin e sulmit të njësisë së Policisë së Kosovës, “ku si pasojë dy zyrtarë policorë kishin pësuar plagë nga arma e zjarrit”.
“Lidhur me këtë rast kundër tij ishte ngritur kallëzim penal për veprat penale “Pjesëmarrje ose organizimi i grupit kriminal të organizuar”, “Vrasje në tentativë”, “Shkaktim i rrezikut të përgjithshëm” dhe “Sulm ndaj personit zyrtar gjatë kryerjes së detyrës zyrtare””.
Gjithashtu, në njoftim thuhet se “të gjitha veprimet e mëtejme, do të ndërmerren në bashkëpunim dhe koordinim me organet e drejtësisë.
Ndryshe, Policia e Kosovës, përmes një njoftimi, ka bërë të ditur se me 1 prill pas mesnate në Veri, në dy raste të ndara, janë djegur edhe tri vetura të tjerë të serbëve, dy me targa RKS dhe një me targa të Beogradit.
Me rastin e fundit numri i veturave të djegura brenda 3 ditëve në Veri ka shkuar në tetë.
Rasti i parë sipas Policisë së Kosovës ka ndodhur në orët e hershme të mëngjesit në Komunën e Leposaviqit, gjegjësisht afër kopshtit të fëmijëve.
“Një veture me targa RKS i është vënë zjarri, po ashtu nga zjarri është përfshirë edhe një veturë tjetër me targa të Beogradit që ishte afër veturës me targa RKS. Në vendin e ngjarjes kanë dalë njësitet policore dhe zjarrfikësit që kanë fikur zjarrin”, thuhet në njoftim.
Ndërsa rasti tjetër ka ndodhur po ashtu në Leposaviq, afër qendrës së sporteve, ku një veturë me targa RKS është djegur nga persona të dyshuar.
“Në të dy rastet, në vendin e ngjarjes kanë dalë njësitet policore dhe zjarrfikësit që kanë fikur zjarrin”.
Ndryshe Policia e Kosovës, kishte bërë të ditur se të enjten pas mesnate në Veri të vendit janë djegur tri vetura me targa RKS, pas dy veturave të djegura të mërkurën në mesnatë, po ashtu me targa RKS, të cilat u përkasin qytetarëve me nacionalitet serb.
Djegia e veturave të serbëve, të cilët kishin vendosur t’i konvertonin targat e makinave të tyre nga ato ilegale “KM” në legale “RKS” kishte shkaktuar reagime të shumta si nga kori diplomatik ashtu edhe nga zyrtarë institucional e liderë opozitarë.
Ambasadorët e shteteve të QUINT-it kanë dënuar ashpër shkatërrimin e pronës private, me qëllim të frikësimit të popullatës lokale.
Të njëjtin kanë bërë thirrje agjencive të zbatimit të ligjit që të identifikojnë dhe ndjekin me shpejtësi përgjegjësit.
Për incidentet në Veri kishte reaguar edhe ish-kryeministri i Kosovës, Ramush Haradinaj, i cili ka thënë se djegia e veturave të serbëve është një tregues serioz se Serbia po përgatit një skenar për pengimin e zgjedhjeve të jashtëzakonshme në Veri të Kosovë të cilët pritet të mbahen më 23 prill.
Lidhur me djegien e veturave në Veri ka reaguar edhe shefi i kabintetit të presidentes së Kosovë, Blerim Vela, i cili njëjtë sikur Haradinaj, ka konsideruar se incidentet kanë të bëjnë me zgjedhjet në katër komunat veriore të Kosovës.
“Mbrëmë janë djegur edhe tre makina të tjera vetëm se kishin targa RSK. Serbia po përpiqet të krijojë një klimë frike për të prishur jetën normale dhe zgjedhjet e 23 prillit”, ka shkruar Vela në rrjetin e tij social në Twitter.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
