![](https://albanianpost.com/wp-content/uploads/2024/07/Faton-Hajrizi-1.jpg)
Një person është arrestuar nga Policia e Kosovës nën dyshimin se i ka ndihmuar Faton Hajrizit të arratiset nga burgu i Smrekonicës.
Lajmin për Albanian Post e ka konfirmuar zëdhënësi i Policisë së Kosovës, Baki Kelani.
“Në vazhdën e veprimeve hetimore, sot me datë 20.07.2024 është ftuar për intervistim një person mashkull kosovar, për të cilin dyshohet se ka ndihmuar të dyshuarin pas arratisjes nga Qendra Korrektuese në Smrekonicë”.
“Për të gjitha veprimet hetimore është konsultuar prokurori kompetent, me vendim të të cilit personi i dyshuar është ndaluar për 48 orë”, ka thënë Kelani.
Më 19 korrik, zëvendëskryeministri dhe ministri i Punëve të Brendshme të Serbisë, Ivica Daçiç, ka thënë se është likuiduar personi që vrau një polic serb dhe plagosi një tjetër të enjten në Loznicë – kufiri mes Serbisë dhe Bosnje e Hercegovinës – që dyshohet të jetë Faton Hajrizi.
“Pjesëtarët e policisë vranë vrasësin e një polici në afërsi të Loznicës”, tha Daçiç.
Në vendin e ngjarjes, siç raportonin mediat serbe, kishte dalë edhe vet Daçiç.
Daçiç u tha gazetarëve se Fatoni qëlloi gjithsej nëntë plumba në drejtim të policisë serbe kur e gjetën, pas së cilëve ai u vra.
“Ai është raportuar nga një banor i fshatit Trbusnice kur i ka kërkuar ujë”, potencoi Daçiç dhe shtoi se në këtë zonë ndodheshin rreth 400 policë që po e kërkonin.
Ndërsa, gazeta serbe “Blic”, ka shkruar, duke u thirrur në burime të saja, se Faton Hajrizi ka tentuar që të kalojë lumin Drina dhe të arratiset në Bosnje e Hercegovinë, por nuk ia ka dalë.
Sipas kësaj gazete, Hajrizi është fshehur në një kompleks të braktisur fabrike, në të cilin thotë se prej vitesh fshihen emigrantët në pritjeje të një “lidhjeje” për të ikur përtej Drinës.
Për çka u dënua Hajrizi?
Hajrizi u dënua fillimisht për vrasjen e një ushtari rus kur ishte 15 vjeç, dhe gjithashtu për disa vepra të tjera penale.
Ai u dënua për një rast të tentim-vrasje, tri raste të vjedhjeve kryesisht të pjesëve të veturave dhe dy raste të keqpërdorimit të veturave (shfrytëzim pa leje të tyre).
Më 24 janar të 2008-së, vendimi i dytë gjyqësorë për Faton Hajrizin ishte marrë nga Gjykata e atëhershme e Qakut në Mitrovicë.
Ai u dënua për dy vepra të grabitjes së armatosur që sipas gjykatës i bëri në bashkëpunim me dikë tjetër në vitin 2006 në Skenderaj.
Ndërsa në vitin 2019, Gjykata Themelore në Prishtinë e kishte dënuar Hajrizin për vrasjen në tentativë.
Më 19 korrik, Ministria e Punëve të Jashtme dhe Diasporës (MPJD), ka kërkuar nga Zyra Ndërlidhëse e Republikës së Kosovës në Serbi që të konfirmohet identiteti i personit të vrarë – pas raportimeve që personi që dyshohet se është vrarë nga Policia e Serbisë është Faton Hajrizi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com