Arrestohet në Napoli eurodeputeti italian

Një eurodeputet italian i shënjestruar nga drejtësia belge në skandalin e dyshuar të korrupsionit në dobi të Katarit dhe Marokut është arrestuar të premten e 10 shkurtit, njoftuan mediat italiane.

Andrea Cozzolino, i cili ishte në një klinikë në Napoli për ekzaminime mjekësore, u arrestua pasi u largua nga klinika nën një urdhër arresti evropian, tha agjencia Ansa.

Imuniteti i tij, si dhe i eurodeputetit belg Marc Tarabella, u hoqën më 2 shkurt me votim të Parlamentit Evropian.

Sipas një raporti parlamentar, Andrea Cozzolino, i cili deri në janar ishte president i delegacionit të Parlamentit Evropian për marrëdhëniet me Magrebin, ” dyshohet se ka marrë pjesë në një marrëveshje me njerëz të tjerë që parashikonte bashkëpunim për të mbrojtur interesat e shteteve të huaja në Parlamentin Evropian”.

Dhe kjo “në mënyrë të veçantë duke penguar miratimin e rezolutave parlamentare që mund të dëmtojnë interesat e këtyre shteteve, në këmbim të shumave të parave”.

Në këtë rast të madh korrupsioni, hetuesit belgë morën në dorë një milion e gjysmë euro para të gatshme, të sekuestruara nga shtëpitë e Pier Antonio Panzerit, një ish-deputet socialist që u bë udhëheqës i OJQ-ve dhe që është një figurë qendrore në këtë histori, dhe Eurodeputetja socialiste greke Eva Kaili, si dhe në një valixhe të mbajtur nga babai i saj.

Ashtu si Pier Antonio Panzeri, edhe Eva Kaili është i burgosur, si dhe shoqëruesi i saj, italiani Francesco Giorgi, asistent parlamentar dhe një italian tjetër, Niccolo Figa-Talamanca, kreu i një OJQ-je. Ata akuzohen për “Përkatësi në organizatë kriminale”, “Pastrim parash” dhe “Korrupsion”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.