“Hetuesit policor japin një goditje gjigante kundër krimit të organizuar në Evropë”.
Kështu fillon shkrimin gazeta gjermane “Online Focus”, e cila ka raportuar për arrestimin e Bashkim Osmanit, një shqiptar nga Gjermania, i cili njihet për të kaluarën e tij kriminale, mes tjerash tregti me drogë dhe pastrim parash.
Osmani, sipas gazetës ishte në qendër të një hetimi ndërkombëtar të quajtur “Casino Fantauxia Operation” në të cilën është përfshirë edhe Byroja Federale e Investigimit, FBI.
“Bashkim Osmani, i njohur për pastrim parash dhe trafik global të drogës është arrestuar në Kroaci”, shkruan gazeta në fjalë.
Sipas tyre 600 oficerë policorë të përfshirë në këtë aksion kanë kontrolluar rreth 80 objekte dhe kanë arrestuar 44 të dyshuar.
“Në Mallorca të Spanjës një nga destinacionet të cilët u bastisën ishte edhe restoranti i Osmanit “Ritzi Portals” dhe hoteli “BO”, Policia sekuestroi 86 piktura vaji me vlerë pesë milionë euro, shtatë makina super sportive, 16 ora luksoze dhe 200 mijë euro para të gatshme”.
Familja Osmani: Si filloi gjithçka në Hamburg
Ngritja e familjes Osmani filloi në Hamburg të Gjermanisë në mesin e viteve të 90-ta kur Qazim Osmani i njohur me nofkën Felix drejtonte një biznes për lojëra të fatit.
Në fillim të viteve 2000, pasuria e familjes vlerësohej diku rreth 300 milionë euro dhe rrjedhimisht Shërbimi Federal i Inteligjencës Gjermane filloi të interesohej për ta.
Akuza për krim të organizuar ndaj familjes u ngrit – por që e njëjta nuk mund të faktohej kurrë në gjykatë.
Familja Osmani gjithmonë i kishte mohuar kategorikisht të gjitha këto akuza.
Në vitin 2007 gazeta kroate “Nacional”, e cila kishte intervistuar të arrestuarin Osmani, kishte shkruar se familja e tij ishte një nga familjet më të pasura shqiptare në Gjermani.
Gazeta kroate mes tjerash kishte shkruar se Bashkim osmani kishte qenë edhe këshilltar i Ministritë të Kulturës dhe Sportit në Kosovë në vitin 2007, kohë kjo kur Ministria në fjalë drejtohej nga Astrit Haraqija.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
