Drejtori i Përgjithshëm i Policisë së Shtetit, Gledis Nano, ka zbuluar detaje të reja nga operacioni që u përmbyll me arrestimin e Nuredin Dumanit.
“Më datë 29 mars 2022, rreth orës 22:25, në lagjen ‘Apollonia’ në Fier, si rezultat i punës profesionale të strukturave të Policisë së Shtetit, u bë lokalizimi dhe kapja e një prej personave më të kërkuar sot në vendin tonë, Nuredin Dumani”, u shpreh fillimisht Nano.
Këtë deklaratë, zyrtari i lartë i policisë e dha gjatë një konference të jashtëzakonshme për mediat në orët e vona të 30 marsit.
Gledis Nano gjendej në praninë e Drejtuesit të Prokurorisë së Rrethit Gjyqësor Elbasan, Kreshnik Ajazi.
Operacioni policor i koduar “Arratia”, bëri të mundur kapjen dhe arrestimin e një prej personave më të kërkuar të dyshuar për disa vrasje, shtoi Nano.
Në finalizimin e operacionit u angazhuan forcat Speciale Renea, Forca e Posaçme Operacionale në Policinë e Shtetit dhe Forcat e Drejtorisë Vendore të Policisë Fier.
Gjatë aksionit policor bashkë me shtetasin Nuredin Dumani u bë e mundur kapja dhe arrestimi i shtetasit H. H., 40 vjeç, banues në lagjen Apollonia, Fier.
Ky i fundit u kap i armatosur me një armë zjarri pistoletë në brez dhe një pistoletë në automjet.
Detajet e operacionit
Nano vërejti më tej se nga kontrolli në banesën ku fshihej Nuredin Dumani, u gjet dhe u sekuestrua edhe një armë zjarri kallashnikov.
Ndërkaq, në banesë u gjetën dhe prova të tjera, të cilat do të analizohen dhe vlerësohen nga Grupi Hetimor, sqaroi drejtori i policisë.
Po gjatë operacionit, u kapën edhe dy persona të tjerë.
Grupi Hetimor po punon për sqarimin e pozitës së tyre, për lidhjet me personin e shumëkërkuar Nuredin Dumani, shtoi Nano.
E gjithë ngjarja ka marrë shkas më 29 mars 2022, rreth orës 17:35, në aksin rrugor Elbasan-Cërrik, në Papër.
Në këtë vendndodhje është qëlluar me armë zjarri ndaj një automjetit tip “BMW”, në të cilin dyshohet se udhëtonte shtetasi i kërkuar.
“Falë veprimeve të shpejta dhe profesionale dhe ndjekjes në një kohë shumë të shpejtë nga strukturat e Drejtorisë Vendore të Policisë Elbasan, u arrit të lokalizohej dhe kapej shtetasi Nuredin Dumani”, deklaroi më tej Nano.
Ai tregoi se po punohet për të sqaruar dinamikën e ngjarjes, si dhe pozicionin e shtetasit Nuredin Dumani.
Dumani, gjatë arrestimit, ishte i plagosur me armë zjarri.
Duke iu kthyer gjendjes së tij shëndetësore, zyrtari i lartë i policisë referoi se është “e stabilizuar”.
Deri tani janë kapur e sekuestruar dy armë zjarri pistoletë dhe dy armë zjarri kallashnikov, (një kallashnikov është sekuestruar nga Policia e Elbasanit).
Në përmbyllje, Nano falënderoi të gjithë instancat e përfshira në këtë operacion.
“Gjej rastin të falënderoj të gjithë punonjësit e Policisë të angazhuar në këtë operacion, të cilët prej disa muajve kanë punuar me intensitet e përkushtim për lokalizimin dhe kapjen e personave shumë të kërkuar”, ravijëzoi ai.
Dumani
Nuredin Dumani njihet si person me precedentë penalë, pasi ka qenë i përfshirë edhe në ngjarjen e 9 prillit 2019, kur në pistën e aeroportit të Rinasit u vodh një shumë e madhe parash që po ngarkoheshin në avion.
Ndërsa, sa i përket operacionit, dyshohet se është kapur si fajtor për ngjarjen Nuredin Dumani, i cili akuzohet edhe si personi që ka vrarë Bujar Çelën, vëllain e Talo Çelës.
Dumani akuzohet prej kohësh se rezulton i implikuar në dy ngjarje të rënda në Durrës, me një bilanc prej 4 viktimash.
Më 2 mars 2020, thuhet se ai ka bashkëpunuar me Talo Çelën, e më pas i ka ekzekutuar të vëllanë, për arsye ende të paqarta.
Operacioni policor është ndërmarrë duke përdorur edhe dronë, ku parësisht është vëzhguar situata për gjetjen e armëve, drogës dhe personave në kërkim për ngjarjen e Elbasanit.
Ai është përmbyllur me sukses me kapjen e Dumanit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Akuzat e Metës ndaj SPAK, Basha: Nuk është sjellje normale, Prokuroria ka trazuar ujërat e kastës 34-vjeçare të politikës
-
Kuvendi miraton me 96 vota marrëveshjen për hapjen e Kolegjit të Evropës në Tiranë
-
Manja prezanton pr/ligjin: Lehtësohet procedura e cerfikimit për “Përkthyesit zyrtar”
-
Marrëveshja për Kolegjin e Evropës, Manastirliu në Kuvend: Ngjarje historike për arsimin e lartë shqiptar