Armenia nuk dëshiron të anëtarësohet në NATO, por “SHBA dhe BE janë partnerë të mirë”

Ministri i Jashtëm armen Ararat Mirzoyan ka thënë se vendi i tij aktualisht nuk ka ndërmend të anëtarësohet në NATO.

Por që po kërkon marrëdhënie më të ngushta me Shtetet e Bashkuara të Amerikës dhe Bashkimin Evropian.

Kështu kanë raportuar mediat vendase.

“Ne tashmë jemi duke bashkëpunuar me NATO-n duke marrë pjesë në operacionet paqeruajtëse në Afganistan dhe duke rritur praninë tonë në Kosovë: kjo është një formë bashkëpunimi”, ka thënë ai.

“Por synimi për t’u anëtarësuar në NATO nuk është një çështje që është në agjendën e Armenisë sot”, ka shtuar Mirzoyan.

Ministri armen ka vijuar duke thënë se “kemi demokraci dhe duam të forcojmë institucionet demokratike”.

“Ne shohim se SHBA dhe BE janë partnerë të rëndësishëm. Tani po thellojmë marrëdhëniet ekonomike dhe politike me Brukselin dhe Washington-in. Ne po përpiqemi të sigurojmë sigurinë dhe zhvillimin tonë përgjatë rrugës demokratike dhe institucionale dhe shohim se ka partnerë të mirë në Perëndim për këtë”.

Zëdhënësja e Ministrisë së Jashtme ruse Maria Zakharova ka deklaruar ditët e fundit se takimi Armeni-BE-SHBA i planifikuar për 5 prill shkakton shqetësim në Moskë.

Kjo sepse Washington-i dhe Brukseli flasin hapur për “natyrën anti-ruse”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.