Armend Zemaj: “Asnjë fyerje nuk ja bëra ministrit Çeku, nga ato që meriton”

Ministri i Kulturës, Hajrullah Çeku dhe deputeti i Lidhjes Demokratike të Kosovës, Armend Zemaj, kanë “fyer” njëri-tjetrin në seancën e Kuvendit e cila po vazhdon edhe sot, për qeverisjen dy vjeçare të Albin Kurtit.

“Asnjë fyerje nuk ja bëra”, ka thënë Armend Zemaj, për Albanian Post.

“Në mungesë të argumenteve me tregu të kundërtën e asaj që keqpërdorimet nga ministri janë bërë në këtë Ministri, pyetjet që i bëra për abuzimet me paranë publike duke paguar këshilltar deri në 5 mijë e 560 euro në muaj në Kosovën e varfër, dhe në pyetjen drejtuar se fondet e subvencioneve janë ndarë për OJQ që ka punuar vetë ministri apo të lidhura me të, ai ato i quajti pa pikë marre e fytyre “gënjeshtër””, tha deputeti Zemaj.

“Asnjë fyerje nuk ja bëra nga ato që meriton një abuzues i buxhetit të parasë publike”, përfundoi Zemaj në prononcimin e shkurtër për AP-në.

Deputeti i LDK-së, Armend Zemaj, ka kërkuar të di nga Ministri i Kulturës Hajrullah Çeku që të tregoj se për çfarë e paguan një këshilltarë me pagë 5 mijë e 560 euro në muaj.

“Sipas informatave që kemi, ju e keni paguar një ekspert që juve ju këshillon me pagë 5 mijë e 560 euro, a mund të na tregosh çfarë cilësie ka ky ekspert, për çka?”, pyeti Zemaj.

Ministri Çeku në replikë, iu përgjigj duke mos e mohuar atë fakt, por duke shtuar se me ato para nuk paguhet një këshillatar, por një konsulent.

Nuk ka këshilltar për ministrin zotëri Zemaj, por është konsulent që është i angazhuar nga administrata. Nuk është emërim politik, nuk është këshilltar i ministrit, nuk ka kuptim që një këshilltar të paguhet kaq shumë. Por ai është konsulent që ofron shërbime të caktuara të cilat e kanë vlerën që e kanë”, i është përgjigjur ministri Çeku.

“Kontrata është publike. Ai ka thënë që për atë shërbim, aq kushton. Nuk është këshilltar i ministrit. Është gabim të bëhen kësi deklarata të pa qëndrueshme”, ka thënë më tej ministri Çeku.

Ndërsa në pyetjen e Zemajt se shumica e subvencioneve të Ministrisë së kulturës kanë shkuar në Prizren dhe në organizatën që ai e themeloi “Ec më ndryshe”, Çeku iu përgjigj duke thënë se “është gënjeshtër. Gënjeshtër zotëri Zemaj”.

Pas këtyre deklaratave në foltore e para mikrofonëve ku dëgjohet zëri edhe për publikun, Zemaj e Çeku kanë vazhduar diskutimin jashtë mikrofonit.

Mësohet se Zemaj e ka quajtur Çekut me fjalët “rrugaç, lahper, majmun”.

Ndërkohë, kryeparlamentari Glauk Konjufca ua ka tërhequr vërejtjen.

“Fjala ‘mashtrim’ dhe ‘gënjeshtër’ nuk është fjalor joparlamentar sepse e keni përdorur edhe ju shumë shpesh dhe është përdorur në këtë Kuvend prej kur e mbaj mend unë. Kështu që fjalët tjera janë joparlamentare, ato që po i thotë Zemaj. Nuk e lejoj këtë”, ka thënë Konjufca.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.