![](https://albanianpost.com/wp-content/uploads/2024/05/Ardita-Sinani-Ragmi-mustaf-600x334-1.png)
Kryetari i Partisë për Veprim Demokratik, njëherësh edhe deputeti i vetëm shqiptar në parlamentin serb, Shaip Kamberi, ka prezantuar dy kandidatë për kryetar të komunave në Preshevë dhe Bujanoc.
Lajmin e ka bërë të ditur Kamberi përmes një shkrimi në rrjetin social ‘Facebook’.
“Për komunën e Preshevës, pas një vlerësimi të kujdesshëm të aftësive dhe angazhimeve të mundshme të kandidatëve, partia ka zgjedhur Ardita Sinanin për të kandiduar për kryetare të komunës”.
“Ardita Sinani është një figurë e njohur në për angazhimin e saj në fushën e zhvillimit social, edukimit dhe përfaqësimit të interesave të qytetarëve në disa fusha të rëndësishme. Përfaqësimi i saj do të sjellë drejtim të ri dhe të energjishëm për të adresuar sfidat dhe të arriturat e komunës së Preshevës”, ka shkruar Kamberi.
Ndërsa për komunën e Bujanocit, ai ka thënë se kandidat do të jetë Ragmi Mustafi.
“Mustafi është një personalitet i njohur në komunën e Bujanocit për angazhimin e tij të gjatë dhe të palodhur në shërbim të zhvillimit dhe përfaqësimit të interesave të qytetarëve të kësaj komune”.
Kamberi të dy kandidatët për këto dy pozita i ka vlerësuar si “të përshtatshëm” dhe “të përkushtuar” për të përfaqësuar dhe për të përmbushur synimet dhe aspiratat e qytetarëve në nivelet lokale të qeverisjes.
“Me një fokus të vazhdueshëm në përmirësimin e kushteve jetësore dhe zhvillimin në tërësi, këto nominime sjellin një periudhë të re të arritjeve dhe përparimit për qytetarët e Preshevës dhe Bujanocit”.
Më 20 prill, Shqiprim Arifi, kishte njoftuar se ishte shkarkuar nga posti i kryetarit të Komunës së Preshevës.
Ky shkarkim, sipas tij, ka ardhur në mënyrë arbitrare dhe duke mos u ndjekur asnjë procedurë ligjore.
“Dje në mesnatë, pushteti autoritar i Beogradit, në mënyrë arbitrare dhe duke mos ndjekur asnjë procedurë ligjore, si dhe pa asnjë njoftim zyrtar, regjimi serb dhe antishqiptar duke vazhduar traditën e Millosheviqit të viteve të 90ta, në mënyrë të dhunshme më shkarkoi nga posti i Kryetarit të Komunës së Preshevës”, kishte shkruar ai.
Pas dy dekadash shqiptarët që jetojnë në pjesë e Luginës së Preshevës kishin marrë pjesë në regjistrimin e popullsisë.
Përfaqësuesit e Luginës së Preshevës vazhdimisht kanë ngritur shqetësime vazhdimisht lidhur me pasivizimin e adresave të banorëve shqiptarë të Preshevës, Medvegjës e Bujanocit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com