Arabia Saudite ‘sundimtare’ e investimeve në sport

Arabia Saudite po përgatitet t’i besohet organizimi i Kupës së Botës 2034 nga FIFA, duke qenë se vendi i Lindjes së Mesme nuk ka asnjë konkurrent që të ketë paraqitur një kandidaturë të plotë deri më 30 tetor.

Kupa e Botës në Futboll, ngjarja sportive më e ndjekur, do të ishte kurorëzimi i politikës sportive, por edhe ekonomike të vendit saudit.

Një studim i fundit, i publikuar nga “Play the Game” dhe i kryer nga Instituti Danez për Studimin e Sportit, thekson se si Arabia Saudite, qofshin investime direkte nga qeveria apo fondet private, është e përfshirë në deri në 312 sponsorizime që përfshijnë 21 sporte, të cilave u shtohen edhe ngjarje të tjera shumësportive.

Interesi kryesor mbetet futbolli, me 83 investime direkte. Pason autosporti me 34 marrëveshje dhe golfi me 33.

Hulumtimi nxjerr në pah se si 139 marrëveshje janë të lidhura drejtpërdrejt me fondin sovran saudit, Fondin e Investimeve Publike (PIF), i cili vlerëson asetet e tij në 700 miliardë dollarë dhe që zotëron shumicën e aksioneve në Newcastle United dhe katër klubet kryesore në Ligën Pro saudite Al Hilal, Al Nassr, Al Ahli dhe Al-Ittihad.

Nga sezoni i ardhshëm, marka “Sela”, një kompani saudite e specializuar në evente të mëdha në vendin e Lindjes së Mesme, do të shfaqet në fanellat e skuadrës angleze, Newcastle.

Sa i përket golfit, PIF zotëron LIV Golf , i cili krenohet me profesionistë të mëdhenj dhe dëshiron të konkurrojë me turneun prestigjoz të PGA.

Duke iu rikthyer futbollit, në tetor, organi turistik i vendit, “Visit Saudi”, u bë sponsori i Ligës së re të Futbollit Afrikan dhe partneri zyrtar global i Konfederatës Aziatike të Futbollit. Ajo gjithashtu ka një marrëveshje sponsorizimi me La Liga spanjolle.

Hulumtimi gjithashtu theksoi se kompania kombëtare e naftës e Arabisë Saudite, “Aramco”, është një sponsor kryesor i Formula 1 dhe ka një partneritet global me Këshillin Ndërkombëtar të Kriketit, organi drejtues botëror i sportit.

Studiuesi i “Play the Game”, Stanis Elsborg theksoi për “BBC Sport” se hulumtimi bazohet në informacionin e disponueshëm publikisht dhe raporton vetëm pjesërisht mbi sponsorizimet e vazhdueshme të Arabisë Saudite në botën e sportit.

“Strategjia sportive e Arabisë Saudite menaxhohet nga një grup i vogël individësh që mbajnë pozicione të rëndësishme brenda dhe jashtë sportit”, tha Elsborg. “Ne donim të tregonim se këta njerëz angazhohen në politikën botërore në emër të Arabisë Saudite, si përfaqësues të botës së sportit, por mbi të gjitha si përfaqësues shtetërorë të interesave gjeopolitike të Arabisë Saudite”.

“Për më tepër, nuk ka mungesë të rasteve gjyqësore që përfshijnë entitetet saudite të sapopërmendura. Për shembull, në Shtetet e Bashkuara duan të nënvizojnë se si nga dokumentet e publikuara nga avokatët e LIV Golf, fondi sovran PIF përkufizohet si ‘një instrument sovran i Mbretërisë së Arabisë Saudite’ dhe guvernatori i saj Yasir Al-Rumayyan, president i Newcastle United, është ‘një ministër aktual i qeverisë’”, shtoi ai.

Së fundi, të gjitha këto investime të mëdha do të demonstronin dëshirën e qartë dhe të shprehur për të pastruar imazhin e Arabisë Saudite në sytë e botës, me të ashtuquajturin “sportwashing”, duke bërë kështu që të harrohen të gjitha polemikat për të drejtat civile ende të pa respektuara në vend dhe skandalet e fundit, si vrasja në vitin 2018 e Jamal Khashoggi, një gazetar saudit me bazë në SHBA, i cili ishte një kritik i shquar i qeverisë saudite.

Pa harruar diskursin mjedisor, të mbështetur së fundmi nga Freddie Daley, një ambientalist që i përket grupit “Badvertising”

“Përpjekja e Arabisë Saudite në sport është një përpjekje e bashkërenduar, e synuar dhe strategjikisht e mprehtë për të forcuar pozicionin e saj në skenën botërore dhe për të shfrytëzuar fuqinë e sportit”, tha ai.

“Është një vend thellësisht i varur nga lëndët djegëse fosile dhe prania e tij masive në sport do ta lejojë atë të promovojë dhe normalizojë produktet me karbon të lartë për miliarda tifozë. Ky hulumtim tregon se sa sporti global është i ndërthurur me investimet saudite dhe organizimi i Kupës së Botës në 2034 do të jetë qershia mbi tortë”, theksoi Daley.

Një vizion që autoritetet saudite e refuzojnë me forcë, duke argumentuar se investimet e vendit në sport do ta ndihmojnë këtë sektor të rritet, brenda dhe jashtë kufijve të tij dhe do t’i ndihmojë ata të modernizojnë Mbretërinë.

E gjithë kjo do të ishte pjesë e strategjisë më të gjerë “Vizioni 2030” e zhvilluar nga Princi i Kurorës, Mohammad bin Salman, i cili gjithashtu synon të diversifikojë ekonominë larg varësisë nga nafta, të stimulojë turizmin dhe të frymëzojë një popullsi të re për të qenë më aktive.

Së fundi, vende të tjera të Lindjes së Mesme si Emiratet e Bashkuara Arabe kanë vendosur gjithashtu të përdorin kompani shtetërore për të kryer sponsorizime në botën e sportit. Vetëm mendoni për rolin e “Emirates”, i cili ka rolin e sponsorit kryesor në klubet kryesore si Real Madrid, Milan dhe Arsenal, për të përmendur vetëm disa, me stadiumin e “Topçinjve” që mban emrin e linjës ajrore me bazë në Dubai.

Me Ronaldo-n, ambicia gjeopolitike përmes sportit e vendeve të Gjirit nuk fshihet më

Arabia Saudite ka shpenzuar mbi 6 miliardë dollarë në ‘sportswashing’

Sporti, strategjia e pandalshme e Arabisë Saudite

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.