Apeli i GKKO-së lë në burg Plaurent Dervishajn

Gjykata e Posaçme e Apelit për Korrupsionin dhe Krimin e Organizuar (GJKKO) ka lënë në burg Plaurent Dervishajn.

Me trup gjykues të përbërë nga gjyqtarët Florjan Kalaja (kryesues), Iliriana Olldashi (anëtare) dhe Miliana Muça (anëtare), sot GJKKO vendosi miratimin e vendimit nr. 103, datë 16.08.2024 të Gjykatës së Posaçme të Shkallës së Parë për Korrupsionin dhe Krimin e Organizuar.

Atentati

Në vitin 2019 një atentat me breshëri automatiku u bë ndaj ish-prokurorit Ndoja pranë mbikalimit të Shkozetit.

Atë ditë, Ndoj ishte në automjet me një person me precedentë penalë, Aleksandër Laho, i njohur si “Rrumi i Shijakut” si dhe me Andi Malokun, ish-punonjës i policisë në komisariatin e Krujës.

Maloku punonte si shofer i prokurorit dhe mbeti i vdekur.

Prokurori më pas iu nënshtrua procesit të Vetting-ut, nga ku u vërtetua se ka pasur kontakte personazhe të botës së krimit.

Po ashtu, u vërtetua se ai ka marrë vendime në favor të miqve të tij me precedentë penalë, ka cenuar etikën gjatë komunikimit me kryeprokuroren e Durrësit Anita Jella, ka pasur kontakte me politikanë si dhe i janë gjetur dosje, të cilat nuk ndiqeshin prej tij.

Sipas vendimit, Ndoj kishte kontakte me të paktën nëntë persona të dyshuar dhe të përfshirë në veprimtari të paligjshme.

Fill pas atentatit, atij iu gjet në makinë dosja e gjyqtarit Skerdilajd Konomi, i vrarë në një atentat mafioz në Vlorë si dhe disa dokumente të vjedhura.

Edhe SPAK-u ka konfirmuar për vëzhguesit ndërkombëtarë që monitorojnë procesin e Vettingut, ekzistencën e dy dosjeve me 432 faqe në makinën e prokurorit.

SPAK ka konfirmuar se një nga dosjet e gjetura në makinën e prokurorit ishte vjedhur në Prokurorinë e Durrësit në vitin 2018.

I pyetur gjatë procesit për marrëdhënien me Aleksandër Lahon dhe identitetet e tjerë që ky shtetas disponon, Ndoja ka deklaruar se në dijeninë e tij është i njëjti person dhe se ka marrëdhënie shoqërore që zënë fill nga periudha e ushtrimit të aktivitetit të avokatisë, për shkak të konsulencës ligjore që i ka dhënë.

Komisioni ka siguruar të dhëna se Laho në vitin 2011 dhe 2012 është proceduar penalisht në gjendje të lirë për shkak të një aksidenti rrugor.

Pas administrimit të dosjeve ka rezultuar se ky shtetas është proceduar për veprat penale “shkatërrim i pronës”, “kanosje”, si dhe “shkelje e rregullave të qarkullimit rrugor”, për të cilat është vendosur në të dyja rastet mosfillimi i procedimit penal.

Kështu, atentati shënoi edhe një pikë kyçe edhe në procesin e vetingut të Ndojës.

Laho, i njohur me disa emra, u cilësua nga KPK si një prej kontakteve të papërshtatshme të prokurorit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.