Anulohet kalimi i dosjes gjyqësore tek trupi gjykues në rastin e Bahtijarit, Januzit dhe Shalës
![](https://albanianpost.com/wp-content/uploads/2024/07/FotoJet-12-1-1-1.jpg)
Është anuluar data për kalimin e dosjes së çështjes gjyqësore te trupi gjykues në çështjen ndaj Ismet Bahtijarit, Sabit Januzit dhe Haxhi Shalës – kjo pasi që u konfirmua aktakuza e përbashkët ndaj tyre.
Lajmin e ka bërë të ditur zëdhënësja e Dhomave të Specializuara të Kosovës (DhSK), Angela Griep, në një konferencë për media.
“Duke marrë parasysh akuzën e re dhe për shkak se mbrojtja e Januzit tha se do të dorëzonte një mocion paraprak në lidhje me të më 12 korrik, gjykatësja e procedurës paraprake lëshoi vendim me të cilin anuloi afatin e mëparshëm për dorëzimin e dosjeve gjyqësore paraprake nga mbrojtja më 15 korrik dhe urdhëroi mbrojtjen e Januzit që ta dorëzojë kërkesën për zgjatje të afatit brenda 15 korrikut”.
Ajo udhëzoi mbrojtjen e Bahtijarit dhe Shalës që të dorëzojnë përgjigjet e tyre jo më vonë se 16 korriku.
“Gjyqtarja e procedurës paraprake anuloi afatin e caktuar më parë për kalimin e dosjes së çështjes gjyqësore te trupi gjykues dhe informoi palët se data e re do të caktohet më vonë”, tha Griep.
![](https://albanianpost.com/wp-content/uploads/2024/07/image7-750x430-1.png)
Januzi dhe Bahtijari u deklaruan të pafajshëm gjatë paraqitjes së mëtejshme të tyre lidhur me akuzat e reja që kanë dalë ndaj tyre.
“Më 12 korrik, Sabit Januzi dhe Ismet Bahtijari u vetëdeklaruan të pafajshëm gjatë paraqitjes së mëtejshme të tyre. Seanca publike u mbajt pas konfirmimit nga gjyqtarja e procedurës paraprake të aktakuzës së ndryshuar. Aktakuza e ndryshuar përfshinte një akuzë shtesë kundër z. Januzi dhe z. Bahtijari, për shkak të së cilës u bë e nevojshme paraqitja e mëtejshme e tyre”, tha ajo.
Ndërkaq, njoftoi se është caktuar edhe paneli i Supremes lidhur me kërkesën e Haxhi Shalës për mbrojtje të ligjshmërisë kundër vendimit mbi vazhdimin e paraburgimit ndaj tij.
“Më 17 korrik, paneli i Gjykatës Supreme urdhëroi ZPS-në t’i përgjigjet kërkesës së z. Shala, nëse dëshiron, jo më vonë se të hënën, 5 gusht 2024, dhe mbrojtjen që të kundërpërgjigjet më së voni brenda të hënës, 19 gusht. Paneli përbëhet nga gjykatësit Ekaterina Trendafilova, Kristinë van den Vajgart dhe Daniel Fransen”, tha ajo.
Ndërkaq, është hedhur poshtë kërkesa e mbrojtjes së Shalës për të rishikuar vendimin mbi vazhdimin e paraburgimit.
Zëdhënësja Griep tha se gjithashtu në këtë çështje është hedhur poshtë kërkesa e mbrojtjes së Shalës për të rishikuar vendimin mbi vazhdimin e paraburgimit.
“Gjyqtarja e procedurës paraprake konstatoi se mbrojtja e Shalës nuk kishte vërtetuar gabim në arsyetimin e vendimit të saj të mëparshëm dhe theksoi se vonesat në lidhje me kalimin e dosjes së çështjes gjyqësore te trupi gjykues ndodhën për t’iu përshtatur kërkesave të mbrojtjes”.
Specialja ka marrë vendim që të ulët edhe numri i deklaratave përmbyllëse në këtë çështje gjyqësore, duke shënuar në shtatë numrin e uljeve të redaktimeve në këtë rast.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com