Anomalia e Kurtit: Pasi i tregoi botës se do ketë luftë në Kosovë, tash i fton për investime strategjike
![](https://albanianpost.com/wp-content/uploads/2024/07/aaaaaasdsadsadsad.jpg)
Kundërthëniet e Albin Kurtit përveçse janë bërë të zakonshme, tashmë po kalojnë në nivel tjetër.
E fundit është dualiteti i tij kur flet edhe për luftën te dera edhe për investime nga jashtë.
Derisa paralajmëron se mund të ketë luftë në Kosovë, përmes ndonjë sulmi eventual nga Serbia, në të njëjtën kohë bën thirrje për investime të huaja, posaçërisht nga mërgata.
Madje këtë të martë, Kurti ka lansuar zyrtarisht “Dritarja për Investime të Diasporës”, derisa u tha se kjo nismë parasheh garantimin e kredive investuese për mërgimtarët.
Në anën tjetër, të dhënat e Bankës Qendrore tregojnë se në vitin 2023 kishte “investime të huaja” rreth 800 milionë euro, jashtëzakonisht më pak se shtetet fqinje, por po ashtu sipas të dhënave të BQK-së, tregojnë se mbi 90 për qind të tyre janë blerje e patundshmërive.
Edhe sipas kryetarit të Odës Ekonomike të Kosovës, Lulzim Rafuna, deklaratat e vazhdueshme të krerëve të shtetit të Kosovës se mund të ketë sulm ndaj vendit nga Serbia, po bëhen pengesë për thithjen e investimeve të huaja në vend.
“Një ndër pengesat pse investimet e huaja nuk vijnë në Kosovë, janë mesazhet që po përçohen. Ne duhet të përçojmë mesazhe që Kosova është një vend shumë stabil, një vend miqësor i të bërit biznes”, pati theksuar Rafuna për Agjencinë e Lajmeve Kosovapress.
Së fundi kryeministri Albin Kurti, në një intervistë për prestigjiozen amerikane, CNN, ka potencuar se “Serbia është shumë agresive ndaj Kosovës”.
“Fillimisht duke mos e njohur si shtet të pavarur, krahas kësaj është e angazhuar në luftë hibride dhe bën stërvitje ushtarake në kufi”, i tha ai gazetares britaniko-iraniane, Christiane Amanpour.
Duke nënvizuar faktin se Serbia ka 48 baza operative përgjatë kufirit me Kosovën, Kurti potencoi se Beogradi është “në pritje të një dritareje të re të mundësive”.
“Ajo çfarë kërkojmë nga partnerët perëndimorë është që t’i bëjnë presion Beogradit që t’i tërheqin këto baza, që secila që ka 50-150 ushtarë, oficerë me pajisje, municion dhe armatim ushtarak ruse, por edhe atë kinez”, ka potencuar Kurti.
Edhe kryeparlamentari, Glauk Konjufca, gjatë javës së kaluar shprehur se ka informacione të sakta se me qindra njerëz në Serbi po ushtrohen dhe po përgatiten për një sulm të mundshëm ndaj Kosovës.
“Ka informacione të sakta se një grup prej qindra personash sërish po e bëjnë të njëjtën gjë në Serbi, po ushtrojnë po përgatiten për ndonjë sulm eventual që mund ta përjetojmë”, kishte theksuar Konjufca.
Në të njëjtën linjë me Kurtin e Konjufcën është edhe ministrja e Punëve të Jashtme të Kosovës, Donika Gërvalla, e cila i ka thënë medias kroate Vecernji List se “do të shpërthejë luftë e gjithanshme në rajon”.
“Vuçiç është zgjatim i dorës së (Vladimir) Putin-it dhe nëse Perëndimi vazhdon t’i tolerojë veprimet e tij, në rajon do të shpërthejë një luftë e gjithanshme”, pohoi Gërvalla, citon mediumi kroat.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Iu vazhdohet paraburgimi edhe për dy muaj të dyshuarve për vrasjen e Liridona Ademajt
-
Vazhdon gjykimi ndaj ish-krerëve të UÇK-së
-
BE-ja përsërit thirrjen për “zbatim urgjent” të marrëveshjeve midis Kosovës dhe Serbisë
-
Pushteti i LVV-së akuzohet për reklamimin e “grafikoneve imagjinare” që s’e pasqyrojnë “realitetin e hidhur” në Kosovë