Anna Oxa flet mbi origjinën: Jam shqiptare dhe kam jetuar si e huaj në Itali

Artistja e njohur me origjinë shqiptare, Anna Oxa së fundmi ka folur pikërisht mbi rrënjët e saj.

Oxa, e lindur në Bari në një familje me rrënjë shqiptare, në një intervistë për programin e njohur italian “Domenica In”, ka thënë se ndihet krenare për trashëgiminë e saj dhe e shikon si një aspekt të domosdoshëm të identitetit të saj.

“Askush nuk e di që kam lindur në një familje në Bari, nëna dhe babai im janë shqiptarë. Isha dhe jam shqiptare dhe është një gjë e rëndësishme, sepse jeta intensive që kisha ishte e një të huaje në Itali”, deklaroi pos tjerash artistja me origjinë nga Kruja.

Gjatë intervistës me prezantuesen e famshme italiane, Mara Venier, Oxa ka rrëfyer mbi përvojat e saj, duke vënë theksin në udhëtimin e saj të pasur artistik dhe ndryshimet personale që ka ndjekur gjatë viteve.

Oxa hodhi dritë mbi lidhjen e saj të thellë me mjedisin natyror, që e ka ndihmuar të rimarrë kontaktin me veten dhe të përdorë muzikën si një mjet për të shprehur brendësinë e saj.

Artistja tregoi se aktualisht jeton në një ambient malor, larg zhurmës metropolitane, pasi që kjo i jep asaj qetësinë dhe lirinë që e ka dëshiruar përherë.

Venier e cilësoi këtë si një hap drastik, por Oxa sqaroi menjëherë se për të, jetesa në natyrë është një zgjedhje që sjell lumturi dhe që i ka lejuar të veçojë dhe të vlerësojë bukurinë e thjeshtë të jetës.

Madje, Anna gjithashtu foli për marrëdhënien e saj me emocionet dhe se si vendndodhja e saj në natyrë i ka ndihmuar të përjetojë ndjesi me intensitet dhe të krijojë muzikë që pasqyron vendosmërinë dhe identitetin e saj të vërtetë.

Oxa është e bindur se kjo lidhje e drejtpërdrejtë me natyrën i ka dhënë mundësinë të komunikojë më sinqerisht përmes artit të saj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.