Anëtarët e BTS, Jimin dhe Jung Kook tanimë do vijnë me një emision udhëtimi në Disney+

Dy nga anëtarët e grupit masivisht të popullarizuar K-pop BTS po futen në biznesin e ‘reality show-ve’.

Jimin dhe Jung Kook janë duke luajtur në një ‘reality show’ të ri udhëtimi të titulluar “Are you sure?”, projekt që mban vulën e Disney+.

Shfaqja e re “ndjek Jimin dhe Jung Kook teksa përshkojnë tre vende piktoreske anembanë botës: shteti i Nju Jorkut, SHBA; Ishulli Jeju, Koreja e Jugut; dhe Sapporo, Japoni,” sipas një njoftimi për shtyp.

“Nga një oqean veror në një vendpushim skish me dëborë dhe më shumë, shfaqja kap peizazhe të bukura mes stinëve të ndryshme. Seriali me tetë pjesë do t’i çojë shikuesit në një udhëtim të mbushur me argëtim me Jimin dhe Jung Kook ndërsa hanë, blejnë, gatuajnë, kampojnë, notojnë dhe udhëtojnë së bashku”, u tha tutje në njoftim.

Sipas publikimit, shfaqja “do të japë një vështrim më të thellë në kiminë e pamohueshme dhe miqësinë e dashur të Jimin dhe Jung Kook pasi ata lidhen në një sërë momentesh të paharrueshme gjatë gjithë udhëtimit duke u zhytur në kultura të ndryshme, duke eksploruar aktivitete të ndryshme të mbushura me aksione dhe duke provuar lokalet e kuzhinat”.

Grupi koreano-jugor i nominuar për “Grammy”, BTS, është një nga grupet më të njohura të djemve ndonjëherë.

Grupi u formua në vitin 2013 me shtatë anëtarë: RM, Jin, V, J-Hope, Suga, Jimin dhe Jung Kook. Ata vazhduan të arrinin popullaritet global, me plot këngë që pushtuan top listat boterore.

Jimin dhe Jung Kook kohët e fundit u regjistruan në ushtrinë koreane, e cila është e detyrueshme në vend. Atyre iu bashkuan anëtarët e tjerë të grupit RM dhe V.

BTS pritet të mblidhet sërish si grup rreth vitit 2025, sipas BIGHIT Music.

Seriali origjinal i Jimin dhe Jung Kook do të jetë i disponueshëm për transmetim në mbarë botën në Disney+ më 8 gusht me episodet e reja të publikuara çdo të enjte deri më 19 shtator.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.