Ambasadori i Kosovës në Bangladesh: Shpresoj që njohja nga Nepali të vijë shpejt

Ambasadori i Kosovës në Bangladesh, Güner Ureya, gjithashtu i ngarkuar të kujdeset për Nepalin, në një intervistë për gazetën nepaleze në gjuhën angleze “Annapurna Express” të hënën, megjithëse Kosova dhe Nepali ende nuk kanë vendosur marrëdhënie zyrtare diplomatike, ka thënë se pret që njohja e Kosovës nga Nepali të ndodhë në një të ardhme të afërt.

“Asnjëherë nuk është vonë. Shpresoj që njohja të vijë së shpejti. Gjatë gjithë mandatit tim prej katër vitesh në Azinë Jugore, jam përpjekur gjithashtu të ndjek qëndrimin politik të Katmandu ndaj Kosovës. Nepalezët janë shumë miqësorë me ne. Katmandu është i hapur për komunikim. Fatkeqësisht, ajo ende nuk ka bërë njohjen zyrtare të pavarësisë së Kosovës”.

Ureya ka konsideruar se ekzistojnë mundësi të konsiderueshme për bashkëpunim ndërmjet Kosovës dhe Nepalit, ashtu sikurse bashkëpunimi ndërmjet Kosovës dhe Bangladeshit, një komb i Azisë Jugore, i cili e ka njohur Kosovën disa vite më parë dhe që atëherë ka zhvilluar marrëdhënie të ngushta dhe miqësore në drejtim të bashkëpunimit dypalësh.

“Në mënyrë të ngjashme, ne synojmë të krijojmë një lidhje të ngjashme me Nepalin. Potenciali për bashkëpunim shtrihet në sektorë të ndryshëm, duke përfshirë arsimin, ekonominë dhe veçanërisht bujqësinë. Si një vend relativisht i ri, ne kemi arritur sukses të dukshëm në sport dhe jemi të prirur të ndajmë përvojat tona me Nepalin në këtë drejtim”.

Diplomati kosovar ndër të tjera ka theksuar se Kosova ka potencial për të zhvilluar marrëdhënie bilaterale me Nepalin, Indinë, Sri Lankën dhe Butanin, derisa ka shtuar se zhvillimet e përgjithshme në vendet e Azisë Jugore në vitet e fundit kanë tërhequr vëmendjen e kosovarëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.