Ambasada ruse: 306 mercenarë nga Shqipëria e Kosova ikën në Ukrainë, 102 u eliminuan

150 mercenarë nga Shqipëria kanë udhëtuar drejt Ukrainës që prej fillimit të agresionit rus më 24 shkurt 2022 dhe prej tyre, 42 janë eliminuar.

Këto janë shifrat e publikuara nga Ministria ruse e Mbrojtjes, ku është e përfshirë edhe Shqipëria sipas pretendimeve.

Nëpërmjet një liste të gjatë, Kremlini ka publikuar të gjithë shtetet, nga të cilët mendohet se kanë shkuar mercenarë.

Në terma konkretë, nga 150-shja shqiptare, 42 janë eliminuar, 40 janë larguar nga Ukraina dhe 68 gjenden ende atje.

Një numër të lartë mercenarësh drejt Ukrainës e ka pasur edhe Kosova në bazë të listës, me 156 syresh. Prej tyre, 61 janë vrarë dhe 60 janë larguar nga Ukraina tashmë. Pjesa e mbetur prej 35 mercenarësh nga Kosova, gjenden ende në Ukrainë.

Në total, prej vendeve evropiane, sipas mbrojtjes ruse, kanë qenë 4 mijë e 866 mercenarë, të cilët kanë shkuar në Ukrainë.

Pjesa më e madhe, kanë qenë nga Polonia, ku 378 janë eliminuar.

Një numër i lartë kanë qenë edhe nga Rumania dhe Mbretëria e Bashkuar, përkatësisht me 504 dhe 422 mercenarë. 200 prej tyre janë eliminuar sipas rusëve.

Nga rajoni i Ballkanit, numrin më të lartë, pretendohet se e ka dërguar Kroacia, me 204, ku 74 janë vrarë.

Sa i përket kontinentit amerikan, Kanadaja mban rekordin sipas Rusisë me 601 mercenarë të dërguar. 162 prej tyre janë vrarë dhe vetëm 270 janë aktualisht në Ukrainë.

Nga SHBA-të, kanë udhëtuar 530 mercenarë drejt Ukrainës, por 214 janë vrarë.

Nga Amerika e Jugut ka pasur po ashtu mercenarë, por më të paktë në numër.

Nga Gjeorgjia dhe Siria ka pasur një numër të lartë gjithashtu, me 355 prej gjeorgjianëve dhe 200 prej sirianëve.

Në total, 200 prej tyre janë eliminuar sipas Rusisë.

Nëse merren parasysh të gjithë kontinentet, numri total i mercenarëve të shkuar në Ukrainë sipas rusëve është 6 mijë e 956.

Pre tyre, 1 mijë e 956 janë vrarë. 1 mijë e 779 të tjerë janë larguar nga territori ukrainas.

Në të, mbeten ndërkaq 3 mijë e 221 të tjerë.

Këto pretendime janë gjithsesi të paarsyetura dhe të pafaktuara nga ana e Rusisë dhe nuk është hera e parë që Moska i ka pretenduar.

Edhe në raste të tjera, Kremlini ka sjellë në dritë pretendime të tilla, të cilat kanë rezultuar të pavërteta.

Albanian Post ka kontaktuar me Ministrinë për Evropën dhe Punët e Jashtme mbi këtë çështje dhe mbetet në pritje të një përgjigjeje zyrtare lidhur me pretendimet ruse.

Katër muaj më parë, po e njëjta akuzë u hodh nga Kremlini.

Një përgënjeshtrim i menjëhershëm asokohe erdhi nga kryediplomatja shqiptare, Olta Xhaçka, e cila deklaroi se nuk ka asnjë mercenar shqiptar në Ukrainë.

There are no Albanian mercenaries in
Ukraine! This is a lie that Moscow keeps repeating shamelessly! That said, Albania stands with Ukraine and will continue to work with all allies&partners to help end Russia's unprovoked agression on the people of Ukraine. God Bless them🇺🇦❤️🇦🇱

— Olta Xhaçka🇦🇱 (@xhacka_olta) March 4, 2022

Akuzat moskovite ajo i cilësoi si të pavërteta dhe theksoi se Shqipëria dhe Ukraina do të kenë një bashkëpunim të vazhdueshëm e strategjik kundër agresionit rus.

Të njëjtën gjë e ka thënë edhe ministrja e Jashtme e Kosovës, Donika Gërvalla, mbi çështjen në fjalë.

Sipas saj, këto lajme ishin pjesë e një propagande të shpërndarë nga Rusia dhe presidenti Vladimir Putin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.