Shqipëria

Ambasada Gjermane: Nga 5 shtatori, Shqipëria në listë të kuqe nga COVID-19


Fotografi e marrë nga faqja në Facebook e Ambasadës Gjermane në Shqipëri

Ambasada Gjermane nё Tiranё ka njoftuar ditёn e premte se, “nga data 5 shtator 2021, Shqipёria do tё konsiderohet sёrisht si njё vend me rrezik tё lartё nga COVID-19”.

Pёr sa i pёrket hyrjes pёr nё Gjermani, nga Ambasada bëhet me dije se çdo person duhet tё regjistrohet nё faqen e internetit, për të plotësuar formularin.

“Gjatë regjistrimit ju duhet të ngarkoni një dëshmi shërimi nga një infeksion me COVID-19 ose që jeni plotësisht të vaksinuar”, njofton përfaqësia gjermane në Tiranë.

Nëse nuk mund të paraqisni asnjërën nga këto dy dëshmi, një test i COVID-19 është i nevojshëm për të hyrë në Gjermani, sipas njoftimit.

Ambasada ka njoftuar gjithashtu se, pas mbërritjes, ёshtё i nevojshёm njё karantinim prej dhjetë ditësh, ose dorëzimi i një testi negativ pas pesë ditësh.

“Pas pesë ditësh, ju mund të testoheni përsëri dhe, nëse rezultati i testit është negativ, mund t’i jepni fund karantinës”, shkruhet në njoftimin e Ambasadës.

Ky vendim vjen pas dy javësh me një incidencë të shtuar në Shqipëri, për sa u përket rasteve të reja me COVID-19. Tashmë, mesatarisht mbi 800 persona rezultojnë pozitivë çdo ditë.

Numri i vdekjeve është rritur po ashtu, pas më shumë se një muaji pa vdekje nga virusi.

Një shtim i masave fillestare është marrë në Shqipëri, ndërsa të reja hyjnë në fuqi më 6 shtator.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore