Ambasada e SHBA-së dhe përfaqësia e Bashkimit Evropian, kanë reaguar publikisht mbi vrasjen e sotme të Pjerin Xhuvanit, ish-drejtues i Lëvizjes Socialiste për Integrim në Elbasan, nga Arbër Paplekaj, shoqërues i sekretarit të Përgjithshëm të Partisë Demokratike, Gazment Bardhi.
“Kemi ndjekur raportimet për dhunën në Elbasan sot, e cila përfundoi në vdekjen e një personi dhe plagosjen e të tjerëve”, shkruhet në postimin e Ambasadës Amerikane. “Ne u bëjmë thirrje zyrtarëve të zbatimit të ligjit të hetojnë këtë incident sa më shpejt dhe në mënyrë të plotë, të identifikojnë autorët dhe t’i dënojnë me të gjithë forcën e ligjit”.
(1/3) We call on law enforcement to investigate today’s incident in Elbasan quickly & thoroughly, identify perpetrators, & prosecute to the full extent of the law. Those who engage in such violence must be punished. https://t.co/WLu01YKlUT
— Ambassador Yuri Kim (@USAmbAlbania) April 21, 2021
Ambasadorja Yuri Kim ka kërkuar gjithashtu vetëpërmbajtje nga ana e presidentit Ilir Meta, kryeministrit Edi Rama dhe kryedemokratit Lulzim Basha. Sipas saj, ata “duhet të udhëheqin në të njëjtën mënyrë, ndërkohë që ngjarja po hetohet”.
“Veprimet tona duhet të bazohen në fakte, jo në frikë apo thashetheme. Kur vetëm disa ditë na ndajnë nga zgjedhjet e 25 prillit”.
Thirrje u është bërë sërish gjithë politikanëve, që të refuzojnë dhunën. Gjithashtu, ambasada ka siguruar se do të vazhdojë monitorimin e situatës.
Reagimi i Bashkimit Evropian
Prezenca e Bashkimit Evropian në Shqipëri, ka kërkuar gjithashtu hetimin e menjëhershëm të vrasjes së ndodhur në Elbasan ditën e sotme.
“Aktet e dhunshme që ndodhën sot në Elbasan duhet të hetohen menjëherë nga autoritetet. Duhet qartësi dhe përgjegjësi për zbardhjen e ngjarjes”.
Akti i dhunshëm që ndodhi sot në Elbasan duhet të hetohet me shpejtësi nga autoritetet kompetente, dhe duhen bërë të qarta përgjegjësitë dhe të ndiqet plotësisht. 1/2
— EU in Albania (@EUinAlbania) April 21, 2021
Përfaqësia evropiane në Tiranë, ka kërkuar gjithashtu ndalimin e akteve të dhunës. Retorika e cila ndez gjakrat, duhet të shmanget gjithashtu sipas tyre. për BE-në, ky është një çast kyç në fushatën elektorale.
Dinamika e ngjarjes
Vrasja e Xhuvanit ka tronditur jo vetëm Elbasanin, por gjithë opinionin publik.
Ngjarja ndodhi pak pas mesdite në qytetin e Elbasanit. Disa minuta pas ngjarjes, autori u arrestua nga forcat policore. Tre persona të tjerë kanë mbetur të plagosur.
Ndër to, një efektive e forcave Shqiponja ka mbetur e plagosur në këmbë.
Paplekaj ka qenë shoqërues i Bardhit në Elbasan. Ai gjithashtu ka qenë pjesëtar i forcave RENEA më parë.
Mbi 20 persona janë shoqëruar në polici për t’u pyetur mbi ngjarjen. Ndër ta, edhe vetë Gazment Bardhi. Kandidati për deputet i PD-së në Elbasan, Luçiano Boçi, është marrë po ashtu në pyetje.
Detaje të tjera mbi ngjarjen pritet të zbardhen nga policia.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
