“Alo zemlajk” – Si e mbronte kryeministri Kusari Lilën, e cila gënjeu që s’ka folur direkt me Radojiçiç-in
![](https://albanianpost.com/wp-content/uploads/2024/06/bini-e-kusari.jpg)
Gënjeshtra e shefes së grupit parlamentar të Lëvizjes Vetëvendosje, Mimoza Kusari-Lila, kinse me terroristin Milan Radojiçiç nuk ka biseduar direkt në telefon, por vetëm përmes interfonit doli në shesh të hënën.
Në një audio-incizim në të ri të publikuar nga mediumi “Nacionale”, Kusari-Lila dëgjohet duke biseduar me Radojiçiç-in, derisa për këtë çështje nuk pati asnjë reagim nga Qeveria as eksponentë të Lëvizjes Vetëvendosje.
Megjithatë, vitin e kaluar kur doli pjesa e parë e këtyre audio-incizimeve, në mbrojtje Kusari-Lilës i kishte dalë kryeministri Albin Kurti, duke thënë se kryedeputetja e LVV-së “e ka për detyrë që të sigurojë vota në Kuvend”.
“Shefja e grupit parlamentar natyrisht jo vetëm që komunikon me shefat e grupeve të tjera parlamentare, por e ka për detyrë që të sigurohen sa më shumë vota. Qeveria ka zero varësi nga Lista Serbe”, pati theksuar ai para gazetareve duke i arsyetuar bisedat e Kusari-Lilës me Radojiçiçin dhe zyrtarë të tjerë të Listës Serbe.
Madje Kurti i besonte gënjeshtrës së Kusari-Lilës, se biseda e saj ishte zhvilluar në interfon me ish-nënkryetarin e Listës Serbe.
“Gjatë takimit që ajo ka pasur kur anëtarë të Listës Serbe ishin në Kuvend, aty asaj i është lëshuar në interfon që s’mund të thuhet se është takim”, thoshte i bindur Kurti.
Në anën tjetër, Kusari-Lila pati treguar se përkundër që kishte folur me një kriminel, kryeministri nuk ia kishte kërkuar dorëheqjen.
“Unë kam kërkuar vetë t’ia shpjegojë situatën, kryeministri ka dëgjuar dhe m’i ka bërë edhe disa pyetje shtesë edhe nuk e ka kërkuar dorëheqjen time”, kishte potencuar ajo.
Ndërkaq vetëm dy muaj pasi Kusari-Lila e pranoi që ka biseduar me Radojiçiçin, ky i fundit së bashkë me një grup të armatosur më 24 shtator të vitit të kaluar ka sulmuar Policinë e Kosovës në Banjë të Zveçanit, duke e vrarë rreshterin Afrim Bunajku.
Publikimi i audio-përgjimeve të reja, nxiti reagime të shumta në vend, derisa ish-kryeinspektori i Agjencisë Kosovare të Inteligjencës, Burim Ramadani, ka kërkuar dorëheqjen e Kusari-Lilës.
“Pra, në pak sekonda që dëgjohet telefonata, ajo më shumë ishte raportim për agjendën ditore të Mimozës. Mimoza, dorëhiqu sot dhe rrëfeu për të gjitha detajet me saktësi. Hapja rrugën Prokurorisë të bëjë punën pa presionin e pushtetit”, shkroi ai në Facebook.
Reagime pati edhe nga deputetë të Partisë Demokratike të Kosovës dhe Lidhjes Demokratike të Kosovës të cilët kërkuan që të aktivizohet Prokuroria, meqë sipas tyre, “Kusari-Lila e shndërroi Radojiçiç-in nga një terrorist në një ‘Zemlak’.
Ndryshe, Radojiçiç, i sanksionuar nga Shtetet e Bashkuara të Amerikës dhe Mbretëria e Bashkuar kishte arritur që pas sulmit terrorist të arratisej në Serbi.
Autoritetet e Kosovës akuzuan drejtpërdrejtë Serbinë se qëndron prapa këtij sulmi terrorist, teksa Radojiçiç – njeri i besuar i presidentit serb Aleksandër Vuçiç – ka marrë përgjegjësinë për këtë sulm.
Ai ishte arrestuar nga autoritetet serbe, për t’u liruar një ditë më pas. Organizata ndërkombëtare policore “INTERPOL”, ka lëshuar një urdhër-arrest për kryekriminelin Milan Radoijçiç dhe 11 persona të tjerë për sulmin terrorist në Banjë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com