Të shtunën e 12 qershorit, u hapën votimet në Algjeri për zgjedhjet parlamentare. Presidenti i Algjerisë, Abdelmadjid Tebboune, ka bërë thirrje për një pjesëmarrje të lartë.
Entuziazmi i publikut është i ulët. Shumë algjerianë janë të bindur se pushteti i vërtetë kontrollohet nga ushtria dhe forcat e sigurisë.
“Ne shpresojmë që parlamenti i ardhshëm të jetë një forcë që bën presion për ndryshim që shumica dëshiron”, tha Ali Djemai, një mësues 33-vjeçar.
Por, në një kafene aty pranë, punonjësi 42 vjeçar i postës Djamel Badir tha se zgjedhjet nuk do të ndryshonin asgjë dhe se ai nuk do të votojë.
“Parlamenti ynë është i pafuqishëm”, tha ai.
Zgjedhjet zhvillohen në sfondin e trazirave politike. Kjo, pasi lëvizja protestuese “Hirak” pa udhëheqje çoi në rrëzimin e Presidentit veteran Abdelaziz Bouteflika në 2019 dhe rënien e shumë zyrtarëve të tjerë të lartë.
Hirak dëshiron një spastrim të plotë të elitës në pushtet dhe tërheqjen e ushtrisë nga politika.
Megjithëse elita në pushtet e ka mirëpritur publikisht Hirak-un si një lëvizje të ripërtëritjes kombëtare, autoritetet gjithashtu kanë goditur lëvizjen me arrestime.
Partitë e vjetra kryesore që kanë dominuar për dekada, fronti çlirimtar i FLN-së që fitoi pavarësinë e Algjerisë nga Franca dhe partia RND, u dëmtuan nga akuzat e korrupsionit kundër aleatëve të Bouteflika-s.
Votimet janë planifikuar të mbyllen zyrtarisht në 19:00, megjithëse në disa zgjedhje të mëparshme ato janë mbajtur të hapura më vonë dhe rezultatet do të shpallen të dielën.
Partitë që fitojnë një pozicion të fortë në parlament ka të ngjarë të jenë pjesë e qeverisë së ardhshme të Tebboune-t.
Të ardhurat nga energjia, që janë shtylla kryesore e një ekonomie të mbyllur, të kontrolluar nga shteti, kanë rënë shumë vitet e fundit. Rezervat e valutave të huaja kanë rënë me katër të pestat që nga viti 2013.
Qeveritë parardhëse kanë premtuar në mënyrë të përsëritur reforma për të diversifikuar ekonominë dhe për të nxitur rritjen e sektorit privat dhe investime të reja, por pa asnjë rezultat.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
