Pakti i ri i unitetit të së majtës në Francë po tregon përçarje, vetëm dy ditë pasi u formua në një lëvizje që kërcënoi të eklipsonte aleancën centriste të Emmanuel Macron në zgjedhjet e parakohshme të ardhshme.
Udhëheqësi i ekstremit të majtë, Jean-Luc Mélenchon, nisi brenda natës një spastrim të të moderuarve në partinë e tij, të cilët kishin mbrojtur unitetin, duke shkaktuar një reagim të furishëm nga liderët e tjerë të majtë.
Olivier Faure, shefi socialist, e quajti atë “skandaloze”.
Mundësia e një qeverie të ekstremit të djathtë me të majtën si forcën më të madhe opozitare – që të dyja kanë plane masive shpenzimesh të pafinancuara – ka tronditur tregjet financiare, duke shkaktuar një shitje të borxhit dhe aksioneve franceze këtë javë.
Qindra mijëra njerëz morën pjesë në një demonstratë në Paris të shtunën pasdite kundër ekstremit të djathtë.
Në kryeqytet janë vendosur 21 mijë policë.
NPF u ra dakord vetëm të enjten pas negociatave intensive midis katër partive të majta.
Palët janë thellësisht të ndara për ekonominë, politikën e BE-së dhe Ukrainën, por kanë varrosur dallimet e tyre për të maksimizuar shanset e tyre kundër Tubimit Kombëtar të Marine Le Pen.
Por spastrimi i Mélenchon e ka vënë nën tendosje NPF-në.
Kreu i France Insoumise hoqi disa kolegë që kishin kritikuar më parë pozicionet e tij ekstreme nga lista e kandidatëve zgjedhorë të LFI-së.
Ai përfshiu në listë Adrien Quatennens, një të mbrojtur dhe deputet kontrovers të LFI-së, i cili është akuzuar nga gruaja e tij për dhunë në familje.
Lëvizja e Mélenchon, një politikan thellësisht polarizues, shkaktoi një reagim të furishëm nga anëtarët e spastruar dhe simpatizantët e tyre.
“Është krejtësisht e vogël, e vogël prej tij, të lash hesapet kur sfida tani është të parandalosh të djathtën ekstreme që të marrë pushtetin”, tha Alexis Corbières, një nga deputetët e hequr si kandidat.
Një tjetër, Raquel Garrido, postoi në X: “Turp për ty, Jean-Luc Mélenchon. Ky është sabotim. Por unë mund të bëj më mirë. Ne mund të bëjmë më mirë”.
Kritikët e Mélenchon thonë se besnikëria e tij ndaj Quatennens është një tradhti ndaj parimeve feministe të së majtës.
Zgjedhja e tij e kandidatëve rrezikon të destabilizojë frontin e bashkuar.
Martine Aubry, kryebashkiakja socialiste e Lille ku po qëndron Quatennens, tha se do të mbështeste një kandidat tjetër për të kandiduar kundër tij, duke kundërshtuar paktin e unitetit.
Marrë nga “Financial Times”, përshtatur për Albanian Post
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
