Aksioni i Policisë së Kosovës do të ndikojë “negativisht” në raportin e Borrellit për heqjen e masave, thotë Stano

Zëdhënësi i Bashkimit Evropian (BE), Peter Stano, njoftoi në një konferencë për media të martën se raporti i përfaqësuesit të lartë të BE-së për Politikë të Jashtme dhe Siguri, Josep Borrell, në dorën e të cilit është largimi i masave ndëshkuese, akoma nuk është finalizuar, ndërsa shtoi se operacioni i fundit policor në veriun e territorit do të ndikojë “negativisht” në këtë çështje.

“Masat e BE-së u prezantuan me qëllimin që t’i motivonin autoritetet e Kosovës të punonin në depërshkallëzim dhe çdo gjë që ndodh në terren, që ka një ndikim negativ në përpjekjet që çojnë në depërshkallëzim, do të merret parasysh dhe do të përfshihet në raport”, njoftoi Stano gjatë ditës.

Zyrtarët e BE-së vazhdimisht nënvizojnë se “masat ndëshkuese” ndaj Kosovës që u implementuan në bazë të deklaratës së 27 vendeve anëtare të 3 qershorit 2023, do të tërhiqen vetëm atëherë kur ekzekutivi kosovar të bëjë hapa konkretë në drejtim të deeskalimit të situatës në veri, përfshirë hapjen e procedurave për themelimin e Asociacionit të Komunave me Shumicë Serbe.

Ndryshe, aksioni në veriun e trazuar u ndërmor pak ditë pas dështimit të takimit të shtatë për gjetjen e një zgjidhjeje të përkohshme sa i përket dinarit. Negociatorët e Kosovës dhe Serbisë – Besnik Bislimi e Petar Petkoviç – u mbyllën për mbi tetë orë në një prej zyrave të BE-së në Bruksel më 15 maj për t’i vazhduar negociatat, por që – sërish – rezultuan pa marrëveshje.

BE-ja zor se do t’i largojë masat ndaj Kosovës pas “operacionit përshkallëzues” në veri

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.