![](https://albanianpost.com/wp-content/uploads/2023/11/ali-ahmeti-1.jpg)
Kryetari i Bashkimit Demokratik për Integrim (BDI), njëherit udhëheqësi i koalicionit “Fronti Evropian”, Ali Ahmeti, ka thënë se opozita shqiptare, përkatësisht koalicionin “VLEN”, e ka si qëllim vetëm pushtetin, dhe jo misionin.
Këto komente, Ahmeti i ka bërë në fjalën e tij para qytetarëve në Kërçovë, në tubimin elektoral, ku kërkoi votën e qytetarëve të kësaj komune për kandidatin e “Frontit Evropian” për President të Maqedonisë së Veriut, Bujar Osmani.
“Këta e kanë mendjen te pushteti, nuk e kanë mendjen te misioni”, deklaroi Ahmeti.
Kështu që, sipas tij, “nuk duhet të merremi me ta, dhe bëjnë mirë që vetëm të mos bëjnë lajme të rrejshme, është përçarë BDI-ja, Aleanca, PDSH-ja… ne vetëm na rritet dhe forcohet jeta, por le të jenë më konstruktiv, le të jenë më aktiv”, derisa i bëri thirrje që të merren me atë që në të vërtetë duhet të merren.
“VMRO-ja çdo ditë more na sulmon se gjoja shqiptarët e morën shtetit. Jo more s’kemi marr ne shtet të huaj. Ne jemi në shtetin tonë dhe marrim shtetin tonë”, iu përgjigj Ahmeti akuzave të partisë nacionaliste maqedonase.
![](https://albanianpost.com/wp-content/uploads/2024/04/ali.jpg)
Përveç kësaj, Ahmeti përgjigje pati edhe për akuzat rreth korridorit 8, dhe për këtë referencë mori historinë.
“Dëgjoj deklarata të autoriteteve të ndryshme politike se gjoja gjithë korridori i 8 po ndërtohet në ‘Shqipëri të Madhe’. E madhe apo e vogël korridori i 8 kalon nëpër këto hapësira, këto janë hapësira tona. Po t’i kthemi historisë Iliri kanë qenë, por ne nuk luftojmë që të dalim në Istër, as në gjysmën e Italisë. S’mund ta mohojë askush se ka qenë tokë e Ilirisë”, potencoi.
Përkundër kësaj, kreu i BDI-së theksoi se “ne duam të avancojmë të punojmë dhe të ecë përpara vendi ynë, shteti ynë, komunat tona të përparojnë”, duke insistuar se pikërisht ky është synim i këtij fronti.
“Po ta dija se është i përkohshëm s’do t’i hyja fare kësaj pune, por kam qenë me bindje se të rinjtë e duan bashkimin. Këtij bashkimi dhe këtij misioni duhet t’i qëndrojmë besnik”, porositi ai.
Sa i përket kandidaturës së Osmanit, Ahemti e vlerësoi lartë përgatitjen e tij në krahasim me kundërkandidatët e tjerë, derisa u bëri thirrje qytetarëve që ta mbështesin atë.
Ndryshe, Maqedonia e Veriut në fund të prillit dhe në fillim të majit do të përballet me procese elektorale. Fillimisht do të jenë ato presidenciale, raundi i parë më 24 prill, ndërsa i dyti më 8 maj, së bashku me ato parlamentare.
Në kampin shqiptar në zgjedhjet presidenciale do jenë dy kandidatë, nga 7 sa janë pretendent gjithsejtë. Bujar Osmani nga koalicioni “Fronti Evropian” – që përbëhet nga disa parti shqiptare dhe parti të minoriteteve – i ideuar nga kreu i Bashkimit Demokratik për Integrim, Ali Ahmeti.
Nga ana tjetër është Taravari që ka mbështetjen e “VLEN”-it dhe të kryeministrit Albin Kurti – madje kandidatura e kryetarit të Gostivarit për president ishte bërë pas një takimi që kishte pasur me Kurtin në Prishtinë, së bashku me partnerët e tij të koalicionit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Mexhiti: Po punojmë çdo ditë që ish ushtari i UÇK-së të lirohet
-
LDK-ja pranon ftesën e Osmanit për diskutimin e datës së zgjedhjeve
-
Elshani për garën e kërcimit në Ujman: Për ne është detyrë, dikush mund ta shoh si provokim
-
KFOR: Kemi patrullime të rregullta në kufirin me Serbinë për siguri dhe stabilitet